विश्वकपपछि मैदानमा जम्दै रोनाल्डो, अल नासरको जितमा गरे उत्कृष्ट हेडर गोल

रियाद । पोर्चुगिज स्टार क्रिस्टियानो रोनाल्डोको उत्कृष्ट हेडर गोलको मद्दतले साउदी प्रो लिगअन्तर्गत बुधबार राति सम्पन्न खेलमा अल नासरले आभा क्लबलाई २-१ गोल अन्तरले पराजित गरेको छ । यस जितसँगै अल नासर अंक तालिकाको शीर्ष स्थानमा उक्लिएको छ ।

Watch On

अघिल्लो खेलमा पराजय व्यहोरेको अल नासर घरेलु मैदान अल-अव्वल पार्कमा सुरुवाती समयदेखि नै दबाब बनाए पनि गोल गर्न संघर्ष गरिरहेको थियो । खेलको २२ औँ मिनेटमा एन्जेलोले प्रहार गरेको कर्नर किकलाई सदुपयोग गर्दै ४१ वर्षीय रोनाल्डोले उत्कृष्ट हेडरमार्फत गोल गरी टोलीलाई १-० को अग्रता दिलाएका थिए ।

दोस्रो हाफको ५८ औँ मिनेटमा अब्दुल्लाह अल-हम्दानले गोल गर्दै अल नासरको अग्रता २-० बनाए । खेलको ७५ औँ मिनेटमा आभाका नबिल फेकिरले एक गोल फर्काउँदै खेलमा फर्किने प्रयास गरे पनि बाँकी समयमा थप गोल हुन नसक्दा अल नासर २-१ ले विजयी भयो । यस जितसँगै ६ खेलबाट १५ अंक जोड्दै अल नासर गोल अन्तरका आधारमा अल-हिलाललाई पछि पार्दै तालिकाको शीर्ष स्थानमा पुगेको छ ।

१ हजार गोलको ऐतिहासिक कोशेढुङ्गा नजिक रोनाल्डो

आभा विरुद्धको गोल रोनाल्डोको व्यावसायिक फुटबल करियरको ९७९ औँ आधिकारिक गोल हो । अब उनी फुटबल इतिहासमै पहिलो पटक एक हजार आधिकारिक गोल गर्ने कीर्तिमान बनाउन मात्र २१ गोल टाढा छन् ।

यस सिजन ५ खेलमा ३ गोल गरिसक्नुभएका रोनाल्डोको अल नासरका लागि यो १३२ औँ गोल हो । हालको औसत (प्रति खेल ०.६० गोल) लाई कायम राखेमा रोनाल्डोलाई १ हजार गोलको आँकडा छुन करिब ३५ खेल आवश्यक पर्नेछ ।

साउदी प्रो लिग, किङ्स कप, एएफसी च्याम्पियन्स लिग एलिट र पोर्चुगलका लागि युइएफए नेसन्स लिगका गरी यस सिजन अझै ४० भन्दा बढी खेलहरू बाँकी रहेकाले रोनाल्डोले चालु सिजन २०२६-२७ भित्रै एक हजार गोलको ऐतिहासिक आँकडा पार गर्ने सम्भावना बलियो देखिएको छ ।