मेयर साम्पाङको धम्कीदेखि डराएका मन्त्री किराती, धरानमा विमानस्थलको सम्भावना अध्ययन गर्न समिति गठन

धरान उपमहानरपालिकामा विमानस्थल निर्माणको सम्भाव्यता अध्ययन गर्न नेपाल नागरिक उड्डयन प्राधिकरणले एक अध्ययन समिति गठन गरेको छ ।

Watch On

बुधबार धरान उपमहानगरपालिकाका मेयर हर्क साम्पाङले धरानमा विमानस्थल बनाउन पहल गरिदिन आग्रह गरेको पत्र सामाजिक संजाल फेसबुकमा अपलोड गरेका थिए । 

उनले पत्र मात्रै सार्वजनिक गरेका थिएनन्, त्यसपछि धरानमा विमानस्थल बनाउनुपर्छ नत्र भन्दै सरकारलाई नै धम्कीपूर्ण अभिव्यक्ति सामाजिक संजालमा लेखेका थिए । 

‘विराटनगरमा एयरपोर्ट छ भन्दैमा धरानमा नचाहिने भन्ने हुँदैन !  धरानमा पनि बनाउनु पर्छ है सरकार.. नत्र’, उनले धम्काउँदै लेखेका थिए । 

उनको धम्कीपूर्ण स्टाटसपछि संस्कृति, पर्यटन तथा नागरिक उड्डयन मन्त्री सुदन किरातीले धरानमा विमानस्थल निर्माण गर्न अध्ययन समिति गठन गर्न नागरिक उड्ययन प्राधिकरणलाई निर्देशन दिएको फेसबुकमार्फत जानकारी गराएका थिए । 

उनले लेखेका थिए, ‘धरानमा विमानस्थल निर्माण अध्ययन समिती तत्काल गठन गर्न नागरिक उड्डयन महानिर्देशक लाई निर्देशन गरिएको छ ।’

उनको यो स्टाटसको स्क्रिनसट राख्दै धरानका मेयरले मन्त्री किरातीलाई धन्यवाद दिएका थिए । 

मेयरको धम्कीपूर्ण स्टाटस र उनको रवाफदेखि डराएका मन्त्री किरातीले निर्देशन दिनासाथ प्राधिकरणले समेत अध्ययन समिति गठन गरेको छ । 

प्राधिकरणले प्राधिकरणका प्रबन्धक इन्जिनियर नलविक्रम थापाको संयोजकत्वमा प्रबन्धक अनिल बस्नेत र वरिष्ठ अधिकृत विमल खनाल सदस्य रहेको समिति गठन गरिएको हो ।

यो समितिले धरानमा विमानस्थल बनाउन सकिन्छ कि सकिँदैन भन्ने अध्ययन गरेर सरकारलाई प्रतिवेदन बुझाउने छ । 

देशभरी हाल दर्जनौँ विमानस्थल उडान भर्न नसकेर ठप्प छन् । तर यहि अवस्थामा मेयरको धम्कीकै कारण विमानस्थलबारे अध्ययन गर्न समिति बनाउनु शक्तिको चरम दुरुपयोग हो ।