फुटबलर साम्बालाई भएको के हो ?

काठमाडौं।  राष्ट्रिय महिला फुटबल टोलीकी कप्तान सावित्रा भण्डारी (साम्बा)ले घुँडाको गम्भीर चोटका कारण पुनः जटिल शल्यक्रिया गर्नुपर्ने अवस्था आएको भन्दै उपचारका लागि आर्थिक सहयोगको अपिल गरेपछि समर्थकहरुले उनलाई के भएको हो भन्ने चासो व्यक्त गर्न थालेका छन् ।

करिव दुई महिनादेखि मैदानबाहिर रहेकी साम्बाले आज सामाजिक सञ्जाल फेसबुकमार्फत उपचारका लागि सहयोग गर्न आग्रह गरेकी हुन्। उनले यसअघि गरिएको शल्यक्रियामा हालिएको ग्राफ्ट र एमसिएल (मिडियल कोलेटरल लिगामेन्ट) दुवैमा गम्भीर क्षति पुगेको र उपचारका लागि पुनः जटिल शल्यक्रिया आवश्यक रहेको उल्लेख गरेकी छन् ।

Watch On

यसअघि एन्फा नेतृत्वको पहलमा उपचार व्यवस्थापन र आर्थिक सहयोग प्राप्त भएकाले आफू समयमै पुनरागमन गर्न सफल भएको उनले स्मरण गरेकी छन्। तर यसपटक भने एन्फाबाट वाचा गरिएअनुसार सहयोग नपाएको उनको गुनासो छ। चोट लागेको तीन सातापछि क्लबको पहलमा शल्यक्रियाको मिति तय भए पनि एन्फाले आफ्नै तर्फबाट पहल गर्ने बताउँदै प्रक्रिया अघि नबढाएको उनले बताएकी छन्।

साम्बा अहिले न्युजिल्यान्डको क्लबमा आबद्ध छिन्। क्लबले स्थानीय अस्पतालमै उपचार गराउन तयार रहेको जनाए पनि आफ्नो चोट गम्भीर रहेको भन्दै उनले कतारको अस्पेटार अस्पतालमै उपचार गराउने चाहना राखेकी छन् । उपचारका लागि करिव ८० हजार अमेरिकी डलर खर्च हुने प्रारम्भिक अनुमान छ। एन्फाबाट अपेक्षाकृत सहयोग पाउन नसकेको उनको गुनासो छ।