काठमाडौँ । पूर्व प्रधानमन्त्री एवम् नेकपा एसका सम्मानित नेता झलनाथ खनालले सरकारले आफ्नै देशको सीमा पनि रक्षा गर्न नसकेको आरोप लगाएका छन् । बिहीबार एक सूचना सार्वजनिक गर्दै नेता खनालले यस्तो आरोप लगाएका हुन् । 

शुक्लाफाँटा राष्ट्रिय निकुञ्जमा ९ सय विगाह जमिन भारतले अतिक्रमण गरेको समाचार आजको नयाँ पत्रिका दैनिकले लेखेको छ । सोही समाचार सार्वजनिक भएपछि नेता खनालले यस्तो अभिव्यक्ति दिएका हुन् । 'मुलुकको सीमा रक्षा गर्न कुनै कदम चाल्न सक्दैन । यो दुई तिहाई भनिने भारी भरकम सरकारको अकर्मण्यता, असक्षमता र लापरवाहीको चरम अभिव्यक्ति हो' खनालले भनेका छन् । 

यस्तो छ उनले सार्वजनिक गरेको प्रेस नोटको पूर्णपाठ 

समस्त देशभक्त दिदीबहिनी तथा दाजुभाईहरू

हाम्रो मातृभूमि नेपाल आफ्नो उदयदेखि नै स्वतन्त्र रहेको मुलुक हो । हामी कुनै स्वतन्त्रता दिवस मनाउदैनौँ किनभने हामी कहिल्यै कसैको अधिनस्थ भएनौँ । यो सारा विश्वले थाहा पाएको एउटा सत्य हो । त्यत्तिकै अर्को सत्य के पनि रहिआएको छ भने हाम्रो मुलुकको मूलतः दक्षिणी सीमाबाट एकपछि अर्को सीमा अतिक्रमणहरू निरन्तर हुँदै आएका छन । लिम्पियाधुरा, लिपुलेक र कालापानीको अतिक्रमण त छदै छ, सुस्ता र अन्य कतिपय ठाउँमा पनि समस्या छँदैछन् । अहिले आएर भारतीय पक्षबाट भएको अर्को गम्भीर अतिक्रमणको घटना खुलासा भएको छ ।

नेपालको सुदूरपश्चिमको जिल्ला कञ्चनपुरको दक्षिणी सिमानामा रहेको सीमा स्तम्भ २७ र २८ का बीचमा रहेको करिब एक हजार बिघा (करिब ६६७ हेक्टर) जमिन भारतीयहरूले कब्जा गरेर खेतीपाती समेत गरिरहेको कुरा जानकारीमा आएको छ । यो शुक्लाफाँटा राष्ट्रिय निकुञ्जको क्षेत्र हो । त्यो निकुञ्जको जंगल भएको क्षेत्र हो । त्यहाँ पुग्न आवागमनको पनि समस्या छ र निकुञ्जको सुरक्षाका कारणले नेपाल तिरबाट जो कोही त्यहाँ पुग्न पनि सक्दैन । तर दक्षिणतिरबाट लगातार अतिक्रमणमा भइरहेको कुरा अहिले जानकारीमा आएको छ ।

यो अत्यन्त गम्भीर घटना हो । यसरी देशको भूभाग र सिमाना खुलेआम अतिक्रमण हुँदा पनि यो देशको सरकार देख्न सक्दैन, थाहा पाउन सक्दैन र मुलुकको सीमा रक्षा गर्न कुनै कदम चाल्न सक्दैन । यो दुई तिहाई भनिने भारी भरकम सरकारको अकर्मण्यता, असक्षमता र लापरवाहीको चरम अभिव्यक्ति हो । म यो सरकारलाई त्यो अतिक्रमण भएको ठाउँमा तुरुन्त एउटा शक्ति सम्पन्न निरीक्षण टिम पठाइयोस, स्थानीय प्रशासन, नेपाली सेना, सशस्त्र र जनपथ प्रहरीशक्ति, त्यहाँका जनप्रतिनिधिहरू र पार्टीका प्रतिनिधिहरु समेत पठाइयोस, स्थितिको तुरुन्त जाँचबुझ गरियोस, आवश्यकता अनुसार भारत सरकारसँग समेत वार्ता गरियोस र सम्पूर्ण नेपाली जनताको मुटुको टुक्रा भन्दा प्रिय त्यो भूमिको सुरक्षा गरियोस र त्यसलाई नेपालको अभिन्न भूभागका रूपमा स्थापित गरियोस, हाम्रा सीमा स्तम्भहरुलाई अद्यावधिक गर्नुका साथै सीमानामा नियमित पेट्रोलिङको समेत व्यवस्था गरियोस भनेर म सम्पूर्ण देशभक्त नेपाली जनताको तर्फबाट जोडदार माग गर्दछु । अन्यथा नेपाली जनताको देशभक्तिपूर्ण भावनाको विस्फोटलाई कसैले रोक्न सक्ने छैन ।

मितिस् ११ पुष, २०८१

झलनाथ खनाल

पूर्वप्रधानमन्त्री

तथा

सम्मानित नेता, नेकपा (एकीकृत समाजवादी)