काठमाडौँ । नेपाल उद्योग परिसंघ (सीएनआई) का पदाधिकारीहरु शुक्रबार आगामी आर्थिक वर्षको बजेटका लागि सुझाव बोकेर अर्थ मन्त्रालय पुगेका थिए । सो क्रममा उनीहरुले अर्थमन्त्रीलाई आगामी १० वर्ष नीतिगत स्थितरता हुने सुनिश्चितता गर्न, कच्चा पदार्थमा लाग्ने भन्सार दर कम गर्न, मदिरा तथा सूर्तीजन्य पदार्थमा कर बढाउँदा चोरी पैठारी बढ्ने र राजस्वसमेत प्रभावित हुनेतर्फ सचेत हुन लगायत बिभिन्न विषयमा सुझाव दिए । 

अर्थमन्त्रीसँगको उक्त छलफलमा शारडा ग्रुपका अध्यक्ष शिवरतन शारडा पनि थिए । उनले सरकार गम्भीर भएर लाग्ने हो भने चोरी पैठारी पूर्ण रुपमा रोक्न सकिने रहेछ भन्ने देखिएको बताए । उनले यसको उदाहरण रवि लामिछाने गृहमन्त्री भएको समयको दिए ।  ‘म विशुद्ध उद्योगी–व्यापारी हुँ। मलाई कुनै दल विशेषको पक्षपोषण र राजनीतिक लाभ–हानीको कुरा गर्नु छैन। रवि लामिछानेले गृहमन्त्री भएको समयमा भन्सार नाकाबाट हुने चोरी पैठारी पूर्णरुपमा बन्द भएको थियो ।’  शारडाले भने, ‘नेतृत्वमा प्रतिवद्धता र इच्छाशक्ति भए परिणाम दिन सकिँदो रहेछ भन्ने उदाहरणलाई वर्तमान सरकारले पनि गम्भीर रुपमा लिनुपर्यो।’  

लामिछाने दुईपटक गरी करीव पाँच महिना उपप्रधान एवं गृहमन्त्री भएका थिए । सो समयमा चोरी पैठारी बन्द भएको, भन्सार नाकामा हुने अनियमितता रोकिएको र प्रहरीको सक्रियता बढेको भन्दै निजी क्षेत्रका विभिन्न संघ–संस्थाले मन्त्रालय पुगेरै धन्यवाद दिएका थिए ।  

सो क्रममा सीएनआईले मदिरा तथा सूर्तीजन्य पदार्थमा कर बढाउँदा चोरी पैठारी बढ्ने र राजस्वसमेत प्रभावित हुनेतर्फ सचेत हुन सुझाव दिएको छ। चोरी पैठारीले स्वदेशी उद्योगलाई निकै मर्का परिरहेको र यसबाट सरकारले राजस्वसमेत गुमाइरहेकाले भन्सार नाकाबाट हुने अनियमितता र भन्सार नाका बाहिरबाट भइरहेको अनधिकृत आयात नियन्त्रणका लागि अन्तर सरकारी समन्वय प्रभावकारी बनाउनु पर्नेमा पनि जोड दिएको थियो। 

अर्थमन्त्री विष्णु पौडेलले निजी क्षेत्रको मनोबल उच्च बनाउँदै उत्पादकत्व बढ्ने गरी बजेट ल्याउने आश्वाशन दिएका छन् ।