शहरमा सनसनी मच्चाएको 'सिक्री ग्याङ'

काठमाडौँ । काठमाडौँ शहरमा पछिल्लो समय एउटा ग्याङले खुब हैरानी र त्रासदी मच्चाएको छ । विशेषगरी रिङरोड बाहिरका शान्त तथा आवासिय क्षेत्रमा यो ग्याङको आतंकले महिला, एकल व्यक्ति र बृद्ध बृद्धाहरु त्रसित थिए । त्यो ग्याङ हो सिक्री ग्याङ ।  

Watch On

हो आज हामी त्यो समूहको त्रास र अपराध सैलीबारे चर्चा गर्दैछौँ, जसले सडकमा हिंडिरहेका मानिसहरुको गलाको सिक्री खोसेर मोटरसाइकलमा टाप ठोक्थे । कतिपय अवस्थामा सिक्री पुरै ति ग्याङको हातमा पुग्थ्यो भने कतिपय बेला आधा सिक्री मात्रै । सुनको मूल्य बढेर आकाश छोएको बेला बहुमूल्य सुनको सिक्री लुट्ने एउटा समूह भने अहिले प्रहरीको फन्दामा परेको छ ।

गत असोज ०८ गते ललितपुरको नख्खुडोलबाट सडकमा हिंडिरहेका एक व्यक्तिको डेढ तोलको सिक्री चोरियो । बाइकमा आएका केटाहरुले सिक्री चुडालेर लगे ।

असोज २३ गते काठमाडौंको नागार्जुन नगरपालिका ३ सिङ्गल ट्री नजिकबाट १ तोला १५ लालको आधा सिक्री चुडालेर लगियो । 

यसको तेस्रो दिन नै असोज २६ मा नार्गाजुनकै बुद्ध चोकबाट ३ तोलाको सिक्री थुतेर बाइकमा आएका केटाहरु भागे ।

कात्तिक १ गते काठमाडौँको नागार्जुन नगरपालिका १ राधाकृष्ण मन्दिर नजिकबाट यस्तैगरी एक तोलाको सिक्री आधा चुडालेर लिएर बाइकमा आएको समूह भाग्यो । 

कात्तिक १ गते नै नागार्जुनको रामकोट टेम्पो पार्क नजिकबाट १ तोला २५ लालको सिक्री आधा चुडालेर बाइकमा केटाहरु भागे ।

सोही दिन नागार्जुन नगरपालिका ५ थापाचोक नजिकबाट झोला र स्यामसङ कम्पनीको मोबाइल पनि बाइकमा आएका केटाहरुले लिएर भागे । 

कात्तिक १ गते नै तार्केश्वर नगरपालिका नेपालटारबाट २ तोलाको सिक्री चुडालेर केटाहरु भागे ।

यसरी लुट्थे सिक्री

यो ग्याङमा जम्मा ५ जना छन् । जसमा सुन चोर्न हिंड्ने मोटरसाइकल चलाउने देखि सिक्री थुत्ने, सिक्री किन्ने र बेच्नेसम्म । 

दुइ जना केटाहरु पल्सर कम्पनीको मोटर साइकलमा हिड्छन् । सुन लगाएको महिला, अली भरिलो झोला बोकेको महिला, पुरुष, एकल तथा बृद्ध महिला पुरुष जो देखेपनि उनीहरु पछाडीबाट पिछा गर्छन् । बाइक ति पैदलयात्रीको नजिक लैजान्छन् । अनी बाइकको पछाडी बसेको मान्छेले सोझै घाँटीमा लगाएको सिक्रीमा हात पुर्याएर तान्छ र लछार पछार पारेर लिएर भाग्छन् । 

घाँटीको रहेको सिक्री चोरिएको थाहा पाउँदा नपाउँदै मोटरसाइलमा बत्तिएका चोरहरु कहाँ पुग्छन् पत्तै हुँदैन । 

उपत्याकाका अधिकांस ठाउँमा यो ग्याङबारे अवगत छ तर फेला पर्न सकेका थिएनन् ।  कतिले यही ग्याङको त्रासका कारण पनि बाहिर निस्कदा सुनका गहना लगाउनै छाडेका छन् । यो एक पटक दुई पटक होइन धेरै पटक दोहोरिएको घटना हो । 

कसरी परे चोरहरु फन्दामा   

जेन–जी आन्दोलनपछि घटेको प्रहरीको सक्रियताका कारण यस्ता घटनाहरु सामान्य जस्तै बनेका थिए । तर, एकै प्रकृतिमा दर्जनौँ उजुरी परेपछि प्रहरीले अनुसन्धान तिब्र बनायो । 
धेरैजसो घटना नागार्जुनको रानीबन क्षेत्रमा भएका कारण प्रहरी बृत्त स्वयम्भूले विशेष अनुसन्धान अघि बढायो ।

प्रहरीले हरेक चोक चोकको सिसिटिभि फुटेज केलायो । सिसिटिभिमा देखिएका हरेक शंकास्पद गतिबिधिमाथि निगरानी बढायो । त्यसपछि थाहा भयो यो सबै लुटपाट मच्चाउने ग्याङ त एउटै पो रहेछ । 

यो ग्याङमा अहिलेसम्म ५ जना संलग्न भएको खुलेको छ । यहाँ हरेकको आआफ्नो भूमिका छ । यहाँ बाइक चलाउने, सिक्री थुत्ने, त्यो सिक्री बेच्ने र किन्ने सबैको आ–आफ्नो रोल फिक्स्ड छ ।

यी हुन् सिक्री चोर्ने चोरहरु  

यसरी सिक्री चोर्ने ग्याङका एक जना हुन् सिन्धुली, हरिहरगढी गाउँपालिका ६ घर भइ भक्तपुर, सूर्यविनायक नगरपालिका ५ स्थित तिनधारेमा डेरा कोठा बस्ने वर्ष २८ को राज लामा । उनी सिक्री तान्दा मोटरसाइकल चलाउने व्यक्ति हुन् । 

अर्का व्यक्ति हुन् उदयपुर, ताप्ले गाउँपालिका ४ घर भइ भक्तपुर, बस्ने वर्ष २० को विशाल भन्ने दुर्ग बहादुर मगर । उनी मोटरसाईकलको पछाडी बसेर सिक्री तान्ने व्यक्ति हुन् । 

अर्का व्यक्ति हुन् रामेछापको, लिखु तामाकोसी गाउँपालिका ६ घर भइ भक्तपुरको चाँगुनारायण नगरपालिका २ सल्लाघारीमा श्री लक्ष्मी ज्वलर्स सञ्चालन गर्ने वर्ष ३२ को दिल बहादुर बि.क. । उनी लुटिएको सिक्री बिक्रि गरिदिने व्यक्ती हुन् ।  

ग्याङमा अर्का व्यक्ति छन् बागलुङ, गलकोट नगरपालिका २ घर भइ काठमाडौँ, बूढानीलकण्ठ नगरपालिका ६ सरस्वती नगरमा रहेको बागलुङ कालिका ज्वेलर्सका सञ्चालक वर्ष ४० को गोबिन्द सुनार । उनी लुटिएको सुन किनिदिने व्यक्ति ह्ुन् । 

र पाँचौ व्यक्ति हुन् कैलाली, लम्कीचुहा नगरपालिका ७ घर भइ काठमाडौं, काठमाडौं महानगरपालिका २२ स्थित रहेको मनु जेम्स एण्ड ज्वलर्सका सञ्चालक सन्तोष सुनारको छोरा वर्ष २२ को दिपेस रसाईली । उनी चोरीको सिक्री किनिदिने व्यक्ति हुन् । 

प्रहरीले राज लामा र बिशाल भनिने दुर्गबहादुर मगरको कोठाबाट अचम्मित पार्ने सामग्री बरामद गरेको छ । उनीहरुको कोठाबाट प्रहरीले स्यामसंग मोबाइल ४ थान, रेड्मी मोबाइल २ थान, आइफोन ३ थान, डमी मोबाइल १ थान, एनटिसिको सिम कार्ड ३० थान, एनसेलको सिमकार्ड ३७ थान, आइटेलको सिम कार्ड ३ थान, मोटरसाइकल चोरी गर्न प्रयोग गरिने सामग्री, लुटपाट गर्दा प्रयोग भएका लत्ताकपडा, लक्ष्मी ज्वेलर्सको सुनको बिल, थुनामुक्तको लागि आदेश भएको कागजपत्र लगायत सामग्री भेटेको थियो ।

अहिले सिक्री ग्याङका पाँचै जना काठमाडौँ प्रहरीको नियन्त्रणमा छन् । अदालतबाट ८ दिनको म्याद लिएर उनीहरुको अपराधबारे अनुसन्धान गरिरहेको छ ।