छठ पहाड उक्लिँदैछ, तराई झर्दैछ तीज

काठमाडौँ । कुनै बेला मिथिलाञ्चलको मात्रै पर्वका रुपमा परिचित छठ पर्व पछिल्ला केही वर्षयता राष्ट्रिय पर्व बनेको छ । २०४६ सालको परिवर्तनपछि राज्यबाट ‘राष्ट्रिय पर्व’को मान्यता पाएको यो पर्व ३०-३५ वर्षको अवधिमा सबै समुदायको साझा पर्वको रुपमा स्थापित भएको छ । 

Watch On

राष्ट्र प्रमुख (राष्ट्रपति) देखि विभिन्न दलका शीर्ष नेताहरू परिवारैसहित छठी माताको पूजामा सहभागी भएका छन्, व्रत बसेका छन् । 

आइतबार छठ पर्वको मुख्य दिन, देशभरका जलाशय, ताल, तलाउ र नदी किनार झकिझकाउ छन् । छठी घाट बनाएर सजाइएको छ । छठी माताको मूर्ति प्रतिस्थापन गरिएको छ । विधि पूर्वक पूजा आराधना गरिएको छ । 

व्रतालुहरूले आज साँझ अस्ताउँदो सूर्यलाई अर्घ दिएका छन् । भोलि बिहान उदाउँदो सूर्यलाई अर्घ दिएपछि यो पर्वको विधि समापन समापन हुन्छ । कतिपय व्रतालुहरू त रातभर जाग्रामसमेत बस्ने गर्छन् । छठी माता र सूर्य देवको एक साथ पूजा आराधना गरिने यो पर्वले  धार्मिक महत्व त राख्छ नै सामाजिक सम्बन्ध विस्तारमा पनि सहयोग पुर्याएको छ । 

आइतबार साँझ राष्ट्रपति रामचन्द्र पौडेल काठमाडौँको गौरीघाटस्थित बागमती नदी किनारमा स्थापना गरिएको छठघाटमा पुगेर छठी माताको पूजा आराधना गरे । प्रथम महिला सविता पौडेलसहित गौरीघाट पुगेका उनीहरूले त्यहाँ अस्ताउँदो सूर्यलाई अर्घ दिए ।

देशको सबैभन्दा ठूलो दल रास्वपा सभापति रवि लामिछाने पत्नी निकितासहित छठ पूजामा सहभागी हुन शनिबार नै जनकपुरधाम पुगे । शनिबार पति–पत्नी दुवै खराना पूजामा सहभागी भए, आइतबार साँझ गंगासागरस्थित छठघाट पुगेर सूर्य र छठी माताको पूजा आराधनामा सहभागी भए । सोमबार बिहान दुवैले उदाउँदो सूर्यलाई अर्घ चढाउनेछन् ।

काठमाडौँमै हुर्के बढेका कांग्रेस सभापति गगनकुमार थापा पनि छठ पूजाका लागि पत्नी अञ्जनासहित सर्लाही पुगे । गत चुनावमा गगन सर्लाही–४ बाट उम्मेदवार बनेका थिए । 

चुनावमा मधेश झरेका गगन छठ मनाउन पनि मधेश नै झरे । 

रवि र गगन जस्तै गरी सभामुख डीपी अर्याल पनि बारा र पर्सा पुगेर छठ पूजा गरे । अर्याल रास्वपाका निवर्तमान उपसभापति हुन् । सभापति रवि लामिछानेले उनलाई कार्यवाहक सभापतिको जिम्मेवारीसमेत दिएका थिए । लामिछाने हिरासत र जेलमा हुँदा अर्यालले नै पार्टी संगठन र आन्दोलनको नेतृत्व गरेका थिए । 

पहाडी समुदायका तीन शीर्ष नेता यसपालि छठ पूजाका लागि मधेश झरे । मधेशलाई नै कर्मथलो बनाएका नेताहरू त यसअघिका वर्षहरूमा पनि छठ पूजामा सहभागी हुन्थे, व्रत बस्थे । 

तराई मधेशमा मात्रै होइन, पहाडमै पनि छठ पर्वको उल्लास छ । पहाडी समुदायले पनि उल्लास साथ छठ पर्व मनाइरहेका छन्, व्रत बसेका छन् । अधिकांश छठघाट हेर्दा लाग्छ– यो पर्व मधेशी समुदायको मात्रै होइन, मिथिलाञ्चलवासीको मात्रै होइन, आम नेपालीको हो । 

रास्वपा नेता एवं सांसद मनिष झाको अनुभवमा ‘छठ पर्व पहाड उक्लिएको छ, तीज मधेश झरेको छ।’ छठ पर्वले देशका सबै समुदायलाई एकताबद्ध बनाउन सहयोग गरिरहेको उनको बुझाइ छ । 

पछिल्ला वर्षहरूमा पहाडमा जसरी छठ पर्वको रौनक छाउँछ, उसैगरी पहाडी समुदायमा धुमधामका साथ मनाइने तीज पर्व मधेशमा पनि मनाउने क्रम बढेको छ। 

नेपालका चाडपर्वले सामाजिक एकता र सद्भाव अभिवृद्धि गर्न मद्दत त पुर्याउँछन् नै, यिनै पर्वको माध्यमबाट दलका नेताहरूले आफ्नो प्रभाव विस्तार गर्ने प्रयास पनि गरिरहेका छन् ।