सडकका कुकुर व्यवस्थापन गर्न ‘कुकुर होस्टेल’

बागलुङ । सडकमा छाडिएका तथा भुस्याहा कुकुरको व्यवस्थापनका लागि बागलुङ नगरपालिकाले सञ्चालनमा ल्याएको ‘कुकुर होस्टेल’ प्रभावकारी बन्दै गएको छ। सडकका कुकुर उद्धार गरेर आवास, खानपान र उपचारको व्यवस्था गरिएको होस्टेल नेपालमै नमुना कार्यक्रमका रूपमा विकास हुँदै गएको नगरपालिकाले जनाएको छ।

Watch On

बागलुङ बजारमा सडकका कुकुरको सङ्ख्या बढ्दै गएपछि नगरपालिकाले पाँच महिनाअघिदेखि उद्धार गरेर होस्टेलमा राख्ने अभियान सुरु गरेको हो। नगरपालिकाको यो कार्यक्रमबारे जानकारी लिन अन्य स्थानीय तहका प्रतिनिधिसमेत आउन थालेका छन्।

नगरप्रमुख वसन्तकुमार श्रेष्ठका अनुसार पहिलो चरणमा ५० वटा कुकुर राख्न सकिने क्षमताको होस्टेल निर्माण गरी ३० वटा कुकुर राखेर व्यवस्थापन सुरु गरिएको छ। सडकमा छाडिएका कुकुरबाट मानिसलाई हुने जोखिम कम गर्नुका साथै तिनको संरक्षण गर्ने उद्देश्यले कार्यक्रम अघि बढाइएको उनले बताए।

नगरपालिकाले बागलुङ नगरपालिका–३ स्थित पाँच रोपनी सार्वजनिक जग्गामा तारबारसहित होस्टेल निर्माण गरेको हो। संरचना निर्माणमा एक करोड रुपैयाँ खर्च भएको पशु शाखा प्रमुख मित्रप्रसाद सापकोटाले जानकारी दिए।

नवप्रवर्तन कार्यक्रमअन्तर्गत मुख्यमन्त्री तथा मन्त्रिपरिषद्को कार्यालयसँगको साझेदारीमा निर्माण गरिएको होस्टेलका लागि नगरपालिकाले ३५ लाख र मुख्यमन्त्री कार्यालयले ६५ लाख रुपैयाँ खर्च गरेका छन्।

होस्टेलमा कुकुरका लागि आवास, खानपान र खुला क्षेत्रमा बस्ने व्यवस्था मिलाइएको छ। सामुदायिक कुकुरको व्यवस्थित संरक्षणका लागि नगरपालिकाले दुई वर्षअघि नै नीति तथा कार्यक्रममा होस्टेल निर्माण गर्ने लक्ष्य समावेश गरेको थियो।

पशु शाखा प्रमुख सापकोटाका अनुसार सडकका कुकुरलाई उद्धार गरी होस्टेलमा राख्न थालेपछि बागलुङ बजारमा कुकुरबाट हुने समस्या क्रमशः घट्दै गएको छ। कुकुरको टोकाइबाट हुने जोखिम कम गर्न बजार क्षेत्रका करिब एक हजार ८०० कुकुरलाई रेबिजविरुद्धको खोपसमेत लगाइएको छ।

होस्टेलमा रहेका कुकुरको हेरचाहका लागि एक जना कर्मचारी खटाइएको छ भने नगरपालिकाको पशु शाखाले नियमित स्वास्थ्य परीक्षण र उपचारको व्यवस्था मिलाएको छ। नगर प्रहरीको सहयोगमा पशु विकास शाखाले सडकका कुकुरलाई खोप लगाउने, उद्धार गर्ने र होस्टेलसम्म पुर्‍याउने काम गरिरहेको छ।

होस्टेलमा रहेका कुकुरको खानपानमा पनि नगरपालिकाले विशेष ध्यान दिएको छ। बिहान दूधभात र बेलुका चिकनभात खुवाउने गरिएको छ। आवश्यकताअनुसार पोषणयुक्त खाना दिनुका साथै नियमित स्वास्थ्य परीक्षण र प्राविधिक उपचारसमेत गर्ने गरिएको नगरपालिकाले जनाएको छ।