मुगुमा ६०० मिटर तल खस्यो जिप, तीन जनाको मृत्यु

मुगु । रारातर्फ जाँदै गरेको हाईलक्स जिप मुगुमा सडकबाट करिब ६०० मिटर तल खस्दा तीन जनाको मृत्यु भएको छ भने दुई जना घाइते भएका छन्।

Watch On

आइतबार सुर्खेतबाट रारातर्फ जाँदै गरेको बा १७ च १८६४ नम्बरको जिप छायानाथ रारा नगरपालिका–७ टोप्लास्थित ताल्चा–रारा कच्ची सडक खण्डमा दुर्घटनामा परेको हो।

जिल्ला प्रहरी कार्यालय मुगुका अनुसार जिपमा चालकसहित पाँच जना सवार थिए। दुर्घटनामा काठमाडौंका ५० वर्षीय विजय बस्नेत, ५४ वर्षीय रमेश बिडारी र ५० वर्षीय पूर्णकुमार थापाको मृत्यु भएको छ।

दुर्घटनामा घाइते भएका तीनै जनालाई उद्धार गरी जिल्ला अस्पताल मुगु पुर्‍याइएको थियो। अस्पताल पुर्‍याउनासाथ चिकित्सकले उनीहरूलाई मृत घोषणा गरेका थिए।

दुर्घटनामा ललितपुर महानगरपालिका–१५ की ५४ वर्षीया अन्जु थापा र जिप चालक ५८ वर्षीय कञ्चन थापा घाइते भएका छन्। दुवैको अवस्था मध्यम रहेको र जिल्ला अस्पताल मुगुमै उपचार भइरहेको प्रहरीले जनाएको छ।

दुर्घटनाको खबर पाएपछि जिल्ला प्रहरी कार्यालय मुगुबाट प्रहरी नायब उपरीक्षक रविराज थपलियाको कमान्डमा १० जना र ताल्चास्थित बी.सु. गार्डबाट प्रहरी नायब निरीक्षक डम्बरबहादुर अधिकारीको कमान्डमा सात जना गरी १७ जना प्रहरी उद्धारका लागि घटनास्थल पुगेका थिए।

दुर्घटनाको कारण खुल्न बाँकी छ। जिप चालकले मादक पदार्थ सेवन गरे/नगरेको विषयमा समेत प्रहरीले अनुसन्धान गरिरहेको छ।