जलवायु वित्तका एक दर्जन कार्यक्रममा सहभागी भएर फर्किए अर्थमन्त्री वाग्ले

काठमाडौं । अर्थमन्त्री डा. स्वर्णिम वाग्ले संयुक्त राष्ट्रसंघीय जलवायु परिवर्तनसम्बन्धी महासन्धिका पक्ष राष्ट्रहरूको ३१औँ सम्मेलन (कोप–३१) मा सहभागी भएर आइतबार स्वदेश फर्किएका छन्।

Watch On

तुर्किएमा आयोजित सम्मेलनका क्रममा उनले जलवायु वित्तसम्बन्धी उच्चस्तरीय संवादसहित करिब एक दर्जन कार्यक्रममा सहभागिता जनाएका थिए।

वाग्लेले ४४ वटा अतिकम विकसित राष्ट्र (एलडीसी) का तर्फबाट जलवायु वित्तसम्बन्धी सातौँ द्विवार्षिक मन्त्रीस्तरीय संवादलाई सम्बोधन गरेका थिए। त्यसक्रममा उनले जलवायु वित्तमा अतिकम विकसित राष्ट्रहरूको आवश्यकता र प्राथमिकता प्रस्तुत गरेका थिए।

यस्तै, सात वर्षअघि स्थापना भएको ‘जलवायु मुद्दाका लागि अर्थमन्त्रीहरूको गठबन्धन’मा नेपाललाई १०५औँ सदस्यका रूपमा सहभागी गराउँदै उनले ‘उत्थानशीलताका लागि वित्त’ (Fiscal Space for Resilience) सम्बन्धी नीतिगत अवधारणा छलफलका लागि प्रस्तुत गरेका थिए।

विपद्पछि ऋणमोचनको विश्वव्यापी अभियान चलाउँदै आएकी बार्बाडोसकी प्रधानमन्त्री मिया मोट्ली र जी–२० को आगामी अध्यक्षता गर्न लागेको बेलायतका विदेशमन्त्री एड मिलिब्यान्डसँग पनि वाग्लेले भेटवार्ता गरेका थिए। उनीहरूसँग विपद्पछिको पुनरुत्थान र जलवायु वित्तका लागि विशेष अन्तर्राष्ट्रिय प्याकेजमा सहकार्य गर्ने प्रतिबद्धता प्राप्त भएको अर्थमन्त्रीको सचिवालयले जनाएको छ।

नेपालले कोप–३१ मा उठाएका विषयमा अन्तर्राष्ट्रिय सहयोग जुटाउने उद्देश्यले वाग्लेले पाँचजना प्रभावशाली जलवायु दूतसँग पनि छलफल गरेका थिए। छलफलमा बेलायतकी रेचेल काइट, अस्ट्रेलियाका विल नानकर्भिस, स्विडेनका माटियास फ्रुमेरी, जमैकाका डेल वेबर र संयुक्त राष्ट्रसंघका महासचिवका दूत सेल्विन हार्ट सहभागी थिए।

त्यसैगरी, उनले हरित जलवायु कोषको उच्च नेतृत्वसँग नेपालका लागि सम्भावित भावी कार्यक्रमबारे छलफल गरेका थिए। जेनेभास्थित विश्व मौसम विज्ञान संगठनको जलवायु मापन कोषसम्बन्धी कार्यक्रममा पनि उनले सम्बोधन गरेका थिए। उक्त कार्यक्रमबाट नेपालले समेत लाभ लिइरहेको छ।

जलवायु परिवर्तन र अर्थशास्त्रका क्षेत्रमा ख्याति कमाएका प्राध्यापक योहान रक्स्त्रम र प्राध्यापक निकोलस स्टर्नसँग पनि वाग्लेले भेटवार्ता गरेका थिए।

भ्रमणका क्रममा उनले अमेरिकी सञ्चारमाध्यम द न्युयोर्क टाइम्स लाई अन्तर्वार्तासमेत दिएका थिए। सन् २०२६ का लागि टाइम पत्रिकाले छनोट गरेका जलवायु क्षेत्रका १०० प्रभावशाली व्यक्तित्वको सम्मानमा आयोजित कार्यक्रममा पनि उनी सहभागी भएका थिए। उक्त सूचीमा अर्थमन्त्री वाग्ले पनि समावेश छन्।