मनोज गजुरेलले किन मागे माफी?

काठमाडौं । हास्यकलाकार मनोज गजुरेलले चलचित्र ‘ककाकिकी’को प्रचारका क्रममा गरिएको प्रस्तुतिले दर्शकमा भ्रम सिर्जना गरेको भन्दै माफी मागेका छन्।

Watch On

आइतबार सामाजिक सञ्जालमार्फत उनले चलचित्रका लागि खिचिएको दृश्य र प्रचारात्मक प्रस्तुतिका कारण दर्शकमा भ्रम उत्पन्न भएको भन्दै दुःख व्यक्त गरेका हुन्।

‘म व्यक्तिगत रूपमा सस्तो प्रचारबाजीभन्दा सिर्जनाको गुणस्तर र दर्शकको विश्वासमा आस्था राख्ने मान्छे हुँ। तर हिजोको प्रस्तुतिमा म स्वयं पनि सहभागी हुन पुगेँ। यसबाट दर्शकमा पर्न गएको भ्रम र असुविधाप्रति दुःख व्यक्त गर्दै क्षमाप्रार्थी छु,’ उनले लेखेका छन्।

समाजको मनोविज्ञान संवेदनशील रहेको अवस्थामा मनोरञ्जनका नाममा अनावश्यक भ्रम थप्नु उचित नभएको उनको भनाइ छ। प्रचारमा सिर्जनशीलतासँगै सामाजिक जिम्मेवारी पनि उत्तिकै आवश्यक हुने उनले बताएका छन्।

नियत राम्रो हुँदाहुँदै पनि कहिलेकाहीँ निर्णयगत त्रुटि हुन सक्ने भन्दै उनले त्यसलाई स्वीकार्नु र सुधार्नु सर्जकको दायित्व भएको उल्लेख गरेका छन्।

उनले चलचित्र धेरै कलाकार र प्राविधिकको मेहनतबाट बन्ने भएकाले कुनै एउटा प्रक्रिया वा शैलीका आधारमा समग्र सिर्जनाको मूल्याङ्कन नगरिदिन पनि दर्शकसँग आग्रह गरेका छन्।

यस विषयमा सुझाव, आलोचना, चासो र चिन्ता व्यक्त गर्ने सबैप्रति उनले आभार व्यक्त गरेका छन्।