नागरिकले सुरक्षित महसुस गर्ने राज्य निर्माण आजको आवश्यकता हो : सभामुख अर्याल

बारा । सभामुख डोलप्रसाद (डीपी) अर्यालले समाजमा सुशासन कायम गर्दै सबै नागरिकले सुरक्षित महसुस गर्ने राज्य निर्माण गर्नु आजको प्रमुख आवश्यकता भएको बताएका छन्।

Watch On

बाराको सिमरा–४, औराहास्थित नवनिर्मित कृष्ण प्रणामी मन्दिरको अवलोकन तथा स्थानीय समुदायसँगको भेटघाटका क्रममा शनिबार उनले समाज, संविधान र कानुनले वञ्चित नगरेका विषयमा सबै नागरिकको समान सहभागिता र उपस्थितिको अधिकार रहेको बताए।

आफू निश्चित अवधिका लागि सभामुखको जिम्मेवारीमा रहे पनि आफ्नो सामाजिक धरातल र नागरिकका रूपमा समाजसँगको सम्बन्ध कहिल्यै नबिर्सने उनले बताए।

‘म निश्चित अवधिका लागि सभामुख भएको हुँ, तर मेरो धरातल एउटा साधारण नागरिकका रूपमा यही समाजमा छ। हिजोको मेरो हुर्काइ र भोलि पनि यही समाजमा तपाईँहरूसँगै मिलेर बस्नुपर्ने कुरा म कदापि भुल्न सक्दिनँ,’ उनले भने।

अर्यालले आर्थिक रूपमा नेपालले अझै धेरै प्रगति गर्न बाँकी रहे पनि धर्म, संस्कृति, सम्पदा र विविधताबीचको सामाजिक एकता नेपालको विशिष्ट पहिचान भएको बताए।

जातजाति, भाषा, धर्म तथा हिमाल, पहाड र तराईका नागरिकबीचको आपसी सद्भाव र सहअस्तित्व विश्वसामु प्रस्तुत गर्न सकिने नेपालको उदाहरणीय विशेषता भएको उनको भनाइ थियो।

उनले भ्रष्टाचारमुक्त, सुशासित र सुरक्षित समाज निर्माण गर्दै नागरिकले दुःख पर्दा राज्य र सरकार आफ्नो साथमा रहेको अनुभूति गर्ने वातावरण बनाउनुपर्नेमा जोड दिए। त्यसका लागि संवाद, सहकार्य र समन्वयमार्फत नागरिकका समस्या तथा गुनासो सम्बोधन गर्नुपर्ने उनले बताए।

संघीय संसद्मा कानुन तथा नीति निर्माण गर्दा नेपालका सबै धर्म, संस्कृति, जातजाति र भाषालाई समेट्ने विषयमा आफूले सक्दो प्रयास गर्ने प्रतिबद्धता पनि उनले व्यक्त गरे। विज्ञ तथा सरोकारवालाका सुझाव र अनुभवले भावी पुस्ताका लागि उपयोगी कानुन निर्माण गर्न सहयोग पुग्ने उनको भनाइ थियो।