बिरालो र खरायोको खानामा लुकाएर ल्याइएको २२ करोड मूल्य बराबरको हेरोइन विमानस्थलबाट बरामद

काठमाडौं । बिरालो र खरायोको खानाको प्याकेटमा लुकाएर ल्याइएको २२ करोड रुपैयाँ मूल्यको पाँच किलो ५०० ग्राम सेतो हेरोइनसहित एक भारतीय नागरिक पक्राउ परेका छन्।

Watch On

लागूऔषध नियन्त्रण ब्यूरोका अनुसार पक्राउ पर्नेमा भारतको महाराष्ट्रस्थित पुणेका ५२ वर्षीय रेवराज तिघारे छन्। उनी थाइल्यान्डबाट नेपाल आएका थिए।

कात्तिक २८ गते त्रिभुवन अन्तर्राष्ट्रिय विमानस्थलमा खटिएको प्रहरी टोलीले शंकास्पद यात्रुको निगरानी तथा जाँच गर्ने क्रममा उनलाई पक्राउ गरेको हो। उनको लगेजभित्र बिरालो र खरायोको खानाका प्याकेटमा लुकाएर हेरोइन ल्याइएको अवस्थामा फेला परेको ब्यूरोले जनाएको छ।

ब्यूरोका अनुसार बरामद हेरोइनको नेपाली बजार मूल्य प्रतिग्राम ४० हजार रुपैयाँका दरले २२ करोड रुपैयाँ पर्छ। भारत पुर्‍याइएको भए यसको मूल्य अझ बढी हुने प्रहरीको भनाइ छ।

प्रहरीले उनलाई अन्तर्राष्ट्रिय लागूऔषध कारोबारमा संलग्न गिरोहका मुख्य व्यक्ति भएको दाबी गरेको छ। उनी यसअघि पनि दुईपटक नेपाल आएको अनुसन्धानबाट खुलेको छ।

सन् २०२५ नोभेम्बर ४ र २०२६ फेब्रुअरी २६ मा लाओसबाट नेपाल आएका उनले पहिलोपटक हवाई र दोस्रोपटक स्थलमार्ग हुँदै नेपालबाट भारतसम्म लागूऔषध पुर्‍याएको ब्यूरोको विज्ञप्तिमा उल्लेख छ।

उनले लाओससहित जिम्बाब्वे, सुडान, बंगलादेश, भियतनाम र कम्बोडियासमेत भ्रमण गरेको पाइएको छ। उनको साथबाट मेकानिकल इन्जिनियरको प्रमाणपत्र, एक थान पासपोर्ट र मोबाइलसमेत बरामद भएको प्रहरीले जनाएको छ।

लागूऔषध (नियन्त्रण) ऐन, २०३३ अनुसार बरामद परिमाणको हेरोइन कारोबारमा संलग्नलाई १५ वर्षदेखि जन्मकैदसम्मको कैद र पाँच लाखदेखि २५ लाख रुपैयाँसम्म जरिवाना हुन सक्ने कानुनी व्यवस्था छ।

पक्राउ परेका तिघारेमाथि ब्यूरोले थप अनुसन्धान गरिरहेको छ।