छठको रौनकले झिलिमिली बन्यो सिरहाको ऐतिहासिक सलहेश पोखरी

सिरहा । महापर्व छठको आज तेस्रो दिन। आज साँझ अस्ताउँदो सूर्यलाई अर्घ दिएर पूजा गरिने भएकाले सिरहाका विभिन्न पोखरी, तलाउ तथा नदी किनारमा बिहानैदेखि चहलपहल बढेको छ। छठ पर्वको रौनकसँगै जिल्लाका जलाशय र घाटहरू सजिन थालेका छन्।

Watch On

छठ पर्वका लागि जिल्लाका विभिन्न जलाशय तथा घाटमा सरसफाइ, सजावट र व्यवस्थापनका काम भइरहेका छन्। यसैक्रममा सिरहा सदरमुकामस्थित ऐतिहासिक सलहेश पोखरीलाई पनि झिलिमिली बत्ती र विभिन्न सजावटका सामग्रीले सिँगारिएको छ। पोखरी परिसरलाई आकर्षक बनाउनुका साथै व्रतालु तथा श्रद्धालु भक्तजनको सुविधालाई ध्यानमा राखेर व्यवस्थापनका कामलाई तीव्रता दिइएको छ।

छठ पर्वमा पोखरी तथा नदी किनारमा पुगेर अस्ताउँदो र उदाउँदो सूर्यलाई अर्घ दिने परम्परा छ। यही परम्पराअनुसार आज साँझ व्रतालुहरू पूजा सामग्रीसहित जलाशय तथा घाटमा पुगेर अस्ताउँदो सूर्यलाई अर्घ दिनेछन्। भोलि बिहान उदाउँदो सूर्यलाई अर्घ दिएपछि यस वर्षको छठ पर्व विधिवत् सम्पन्न हुनेछ।

छठका लागि पोखरी परिसरमा सरसफाइ, घाट निर्माण तथा सजावटका कामसँगै व्रतालुहरूलाई पूजा गर्न सहज हुने गरी आवश्यक प्रबन्ध मिलाइएको छ। साँझपख घाटमा परिवारका सदस्य, आफन्त र श्रद्धालुहरूको बाक्लो उपस्थिति रहने भएकाले व्यवस्थापनमा विशेष ध्यान दिइएको छ।

तराई–मधेसमा विशेष उल्लासका साथ मनाइने छठ पर्व पछिल्लो समय पहाडी तथा सहरी क्षेत्रमा पनि उत्तिकै लोकप्रिय बन्दै गएको छ। सूर्यदेव र छठी माताको आराधना गरिने यस पर्वमा व्रतालुहरूले पारिवारिक सुख, शान्ति, समृद्धि, सन्तानको दीर्घायु तथा मनोकामना पूरा हुने विश्वाससहित कठोर व्रत बस्ने गर्छन्।

छठको रौनकले सिरहाका बजारदेखि गाउँबस्ती र जलाशयसम्म उत्सवमय बनेका छन्। विशेषगरी ऐतिहासिक सलहेश पोखरीमा गरिएको सजावटले पर्वको आकर्षण थप बढाएको छ।