नेपाल हुँदै दुईपटक भारत पुर्‍याएका थिए हेरोइन, यसपटक विमानस्थलबाट परे पक्राउ

काठमाडौं । लाओसबाट दुईपटक नेपाल आएर भारतसम्म लागुऔषध ओसारपसार गरेको आरोप लागेका भारतीय नागरिक यसपटक २२ करोड रुपैयाँ मूल्यको हेरोइनसहित पक्राउ परेका छन्।

Watch On

लागूऔषध नियन्त्रण ब्यूरोका अनुसार भारतको महाराष्ट्रस्थित पुणेका ५२ वर्षीय रेवराज तिघारे थाइल्यान्डबाट नेपाल आउने क्रममा त्रिभुवन अन्तर्राष्ट्रिय विमानस्थलबाट पक्राउ परेका हुन्।

ब्यूरोका अनुसार उनी यसअघि सन् २०२५ नोभेम्बर ४ र २०२६ फेब्रुअरी २६ मा लाओसबाट नेपाल आएका थिए। तीमध्ये पहिलोपटक हवाई मार्ग र दोस्रोपटक स्थलमार्ग हुँदै नेपालबाट भारतसम्म लागुऔषध पुर्‍याएको अनुसन्धानबाट खुलेको ब्यूरोले जनाएको छ।

कात्तिक २८ गते थाइल्यान्डबाट नेपाल आएका उनलाई विमानस्थलमा शंकास्पद यात्रुको निगरानी तथा प्रोफाइलिङ गर्ने क्रममा जाँच गरिएको थियो। त्यसक्रममा उनले लगेजभित्र खरायो र बिरालोको खानाका प्याकेटमा लुकाएर ल्याएको पाँच किलो ५०० ग्राम सेतो हेरोइन बरामद भएको हो।

ब्यूरोका अनुसार तिघारे अन्तर्राष्ट्रिय लागुऔषध कारोबारीको सञ्जालका मुख्य व्यक्ति रहेको अनुसन्धानबाट खुलेको छ। उनले लाओससहित जिम्बाब्वे, सुडान, बंगलादेश, भियतनाम र कम्बोडियासमेत भ्रमण गरेको पाइएको छ।

उनको साथबाट मेकानिकल इन्जिनियरको प्रमाणपत्र, एक थान पासपोर्ट र मोबाइलसमेत बरामद भएको प्रहरीले जनाएको छ।

बरामद हेरोइनको नेपाली बजार मूल्य प्रतिग्राम ४० हजार रुपैयाँका दरले २२ करोड रुपैयाँ रहेको ब्यूरोले जनाएको छ। उक्त हेरोइन भारत पु¥याइएको भए त्यहाँ अझ महँगो मूल्यमा बिक्री हुने प्रहरीको भनाइ छ।

लागूऔषध (नियन्त्रण) ऐन, २०३३ अनुसार बरामद परिमाणको हेरोइन कारोबारमा संलग्नलाई १५ वर्षदेखि जन्मकैदसम्मको सजाय र पाँच लाखदेखि २५ लाख रुपैयाँसम्म जरिवाना हुन सक्ने कानुनी व्यवस्था छ।

पक्राउ परेका तिघारेमाथि ब्यूरोले थप अनुसन्धान गरिरहेको छ।