रोल्पाकी क्रान्तिशिखा: रास्वपाको समानुपातिक उम्मेदवार आकांक्षी

काठमाडौँ । रास्वपाका समानुपातिक उम्मेदवार आकांक्षीबीच निर्वाचन जारी छ । आज बिहान ७ बजेबाट सुरु भएको अनलाइन मतदान आइतबार साँझ ७ बजेसम्म चल्ने छ । नेपालको इतिहासमै पहिलो पटक रास्वपाले समानुपातिक उम्मेदवार आन्तरिक निर्वाचनबाट छान्दै छ ।  

समानुपातिक उम्मेदवारका लागि ३ सय ८९ जना निर्वाचनमा सहभागी भएका छन् । ३६ घण्टा चल्ने मतदानपछि उम्मेदवारले प्राप्त गर्ने मतका आधारमा आउने अंक र अन्य प्रक्रियाबाट प्राप्त गर्ने अंक जोडेर प्राप्त कुल अंकका आधारमा १ सय १० जना छनोट हुने छन् । 

समानुपातिक उम्मेदवारका लागि रास्वपाका वडा देखि केन्द्रीय तहसम्मका नेताहरु आकांक्षी देखिएका छन् । साथै प्रावसबाट पनि रास्वपाको समानुपातिक उम्मेदवारका लागि आकांक्षीहरु छन् । 
रास्वपाकी केन्द्रीय सदस्य तथा रास्वपाको वाचापत्र लेखन कार्यदलकी सदस्य क्रान्तिशिखा धिताल पनि समानुपातिक उम्मेदवारको आकांक्षी छिन् । 

रोल्पाको जिनावाङबाट दाङ हुँदै काठमाडौंसम्म आउँदा आफूले देखेको र भोगेको समाजलाई परिवर्तनका लागि राज्यमा हस्तक्षेपकारी, नीतिगत र रूपान्तरणकारी भूमिका निर्वाह गर्नुका लागि आफ्नो उम्मेदवारी रहेको उनको भनाई छ । 

पूर्व पत्रकार समेत रहेकी धितालले मनोविज्ञानमा स्नातक अध्ययन, पत्रकारितामा डिप्लोमा र शान्ति, द्वन्द्व तथा विकासमा स्नातकोत्तर अध्ययन गरेकी छिन् । रास्वपा नेतृसँगै मनोसामाजिक परार्मशदाता समेत रहेकी धिताल सामाजिक तथा राजनीतिक विषयमा स्तम्भकार समेत हुन् । 
विशेषगरी मानसिक स्वास्थ्यको सवाललाई राज्यको जिम्मेवारी र राष्ट्रिय एजेन्डाको रूपमा स्थापित गर्न आफ्नो उम्मेदवारी रहेको बताउँछीन् । 

धिताल पार्टीको नीतिगत दिशानिर्देश तय गर्ने प्रक्रियामा सक्रिय छिन् । रास्वपाको प्रस्तावना,  वाचापत्र   लेखनदेखि विधान संशोधनसम्म प्रत्यक्ष भूमिका खेलेकी धिताल आफू वैचारिक स्पष्टता र विधिसम्मत परिवर्तनको पक्षमा रहेको बताउँछीन् ।

परिवर्तन केवल भाषण वा घोषणामा नभई जनताको विश्वासमा आधारित हुन्छ भन्ने मान्यता राख्ने धिताल यही विश्वास र अनुभवको आधारमा दीर्घकालीन, न्यायपूर्ण र समावेशी परिवर्तन लागि आफ्नो उम्मेदवारी रहेको बताउँछीन् ।