रविबारेका भ्रामक सूचना चिर्ने र प्रतिशोधविरुद्ध हस्ताक्षर अभियान चलाउने प्रमोद न्यौपाने समानुपातिक उम्मेदवार आकांक्षी

काठमाडौँ । ‘नमस्कार, फेसबुक लाइभमा स्वागत छ म प्रमोद न्यौपाने ।’ यो रवि लामिछानेलाई हिरासतमा राखिदादेखि कारागार चलान भएर कारागारमुक्त हुँदासम्म अधिक सुनिएको पंक्ति हो । 

रविबारे बाहिर बिभिन्न कोणबाट समाचारको बाढी आईरहँदा साँझपख टक्क उभिएर फेसबुक लाइभमार्फत जस्ताको तस्तै सूचना दिने गर्थे प्रमोद न्यौपाने । रविको बारेमा आउने विविध एंगलको समाचारले कन्फ्युज हुने दर्शक पाठकहरु उनको फेसबुक लाइभको प्रतिक्षा नै गरेर बस्थे । कतिपय समाचार संस्थाका लागि उनको फेसबुक लाइभ नै रविसम्बन्धी समाचारको मुख्य स्रोत बनेको थियो । 

एभिन्यूज टेलिभिजनदेखि माउन्टेन, न्युज २४, ग्यालेक्सी फोरके, हिमालय लगायत आधादर्जन बढी टेलिभिजनको न्युजरुमको नेतृत्व गरिसकेका न्यौपानेले आफ्नो अनुभवलाई प्रयोग गर्दै पार्टी र सभापतिसम्बद्ध सूचना दर्शकसामु पस्कने गरेका छन् । 

लामिछाने कारगार चलान भएपछि उनले तत्कालिन सरकारले साँधेको राजनीतिक प्रतिशोधविरुद्धको हस्ताक्षर संकलनमा नेतृत्वदायी भूमिका निर्वाह गरे । उनी हस्ताक्षर संकलन   अभियान समितिको सचिव थिए । 

तिनै प्रमोद न्यौपानेले अहिले राष्ट्रिय स्वतन्त्र पार्टीको समानुपातिक उम्मेदवारको आकांक्षी बन्दै आन्तरिक प्रतिष्पर्धामा होमिएका छन् । पार्टी सभापति लामिछानेको प्रेस सल्लाहकारको भूमिकामा रहेका उनले सिन्धुपाल्चोकबाट खस–आर्यतर्फ समानुपातिक उम्मेदवारको आकांक्षी बनेका हुन् । 

उनी भन्छन्, ‘मेरो उम्मेदवारी केवल पदका लागि होइन, पार्टी नीति र नेतृत्वलाई स्थापित गराउन र संसदीय अभ्यासलाई जनमुखी बनाउनका लागि हो ।’  

पार्टीको नीति र नेतृत्वलाई संसदीय मोर्चामा स्थापित गर्न, आन्तरिक लोकतन्त्र र विधि–प्रक्रियाको सम्मान गर्न, जनमैत्री नीति निर्माणमा हस्तक्षेपकारी भूमिका निर्वाह गर्न, सुशासन अभिवृद्धि र भ्रष्टाचारविरुद्धको आवाज बुलन्द गर्न, सुसंस्कृत र जनकेन्द्रित संसदीय अभ्यासलाई बढवा दिन र पार्टी सदस्यहरूको विचार र भावनाको सच्चा प्रतिनिधित्व गर्न आफूले उम्मेदवारी दिएको न्यौपाने बताउँछन् ।