महिला र उपेक्षित समुदायको आवज बन्ने दौडमा मेघना श्रेष्ठ, रास्वपाको समानुपातिक उम्मेदवार आकांक्षी

काठमाडौँ। अभाव र कठिन परिस्थितिसँग संघर्ष गर्दै सक्षम बनेकी समाजसेवी मेघना श्रेष्ठ राष्ट्रिय स्वतन्त्र पार्टी (रास्वपा) बाट समानुपातिक उम्मेदवारका आकांक्षी बनेकी छिन् ।

Watch On

सुनसरीको एक मध्यमवर्गीय परिवारमा जन्मिएकी श्रेष्ठले कलिलो उमेरमै आमाको निधनपछि जीवनका जिम्मेवारी चाँडै सम्हाल्नुपरेको थियो। अभावपूर्ण अवस्थाबाट आत्मनिर्भरता र निर्णय क्षमता विकास गर्दै अघि बढेकी उनी हाल एक आमा, पेशेवर र सचेत नागरिकका रूपमा राजनीतिक यात्रामा छन्।

मानव स्रोत व्यवस्थापनमा विशेषज्ञता हासिल गरेकी श्रेष्ठले व्यवस्थापनमा स्नातकोत्तर (एमबीए) पूरा गरेकी छन्। उनले पढाइलाई व्यवहारिक सुधारसँग जोड्दै प्रयोगमा उतारेको बताउँछिन् । फ्रन्टलाइनबाट ग्राहक सेवाबाट सुरु भएको उनको करियर १५ वर्षभन्दा बढी समयसम्म नेतृत्व, गुणस्तर व्यवस्थापन, तालिम, मानव स्रोत विकास, प्रक्रिया सुधार र प्रणाली निर्माणसम्म फैलिएको छ।

आफ्नो पेशागत यात्राकै क्रममा नीति र व्यवस्थापनका कमजोरीले प्रत्यक्ष रूपमा मानिसको जीवनमा असर पार्ने अनुभव गरेको श्रेष्ठको भनाइ छ। त्यसैले उनी परिवर्तनलाई नाराभन्दा पनि तथ्य, डेटा र परिणाममा आधारित भएर मापन गर्नुपर्नेमा जोड दिन्छिन्।

महिला र आमाको भूमिकाबाट शिक्षा, रोजगारी र सम्मान एक–अर्कासँग गहिरो रूपमा जोडिएको उनको बुझाइ छ। महिलालाई अवसर दिनु भनेको एक व्यक्तिमात्र होइन, परिवार र समुदायलाई सशक्त बनाउनु भएको उनको धारणा छ।

आफ्नो राजनीति प्रवेश आकस्मिक नभई प्रणालीभित्रै रहेर सुधार सम्भव छ भन्ने विश्वासबाट प्रेरित भएको श्रेष्ठ बताउँछीन् । उनले आर्थिक आत्मनिर्भरतामार्फत नीतिगत इमानदारी कायम गर्न सकिने धारणा राखेकी छन्।

रास्वपासँग सुरु भएको उनको राजनीतिक यात्रा अहिले युवा, महिला, श्रमिक र उपेक्षित समुदायका आवाजलाई केन्द्रमा राख्नका लागि आफ्नो उम्मेदवारी रहेको बताएकी छिन् ।