प्रधानमन्त्री कार्की र कतारी समकक्षीबीच टेलिफोन वार्ता, नेपालीको सुरक्षाबारे चासो

काठमाडौं । प्रधानमन्त्री सुशीला कार्कीले कतारका समकक्षी शेख मोहम्मद बिन अब्दुलरहमान अल थानीलाई टेलिफोन गरी त्यहाँ रहेका नेपालीहरुको सुरक्षाबारे चासो व्यक्त गरेकी छन् ।

टेलिफोन वार्तामा प्रधानमन्त्री कार्कीले कतारमा रहेका ३ लाख ६० हजार नेपाली नागरिकलाई सुरक्षा तथा संरक्षण उपलब्ध गराएकोमा नेपाल सरकार र नेपाली जनताको तर्फबाट धन्यवाद दिएको प्रधानमन्त्रीको सचिवालयले जनाएको छ ।

Watch On

प्रधानमन्त्री कार्कीले पश्चिम एसिया क्षेत्रमा विकसित घटनाक्रमलाई नेपालले नजिकबाट नियालीरहेको बताउँदै सम्बद्ध सबै पक्षलाई संयमित रहन, द्वन्द्वलाई थप नचर्काउन र नागरिकको सुरक्षाको प्रत्याभूति हुनुपर्ने नेपालको धारणा रहेको पनि बताइन् । उनले नेपालले सबै राष्ट्रले संयुक्त राष्ट्र संघको बडापत्र, अन्तर्राष्ट्रिय कानुन, जेनेभा अभिसन्धिहरु र मानवीय कानुनको उचित सम्मान र पालना गर्नुपर्ने कुरामा जोड दिइन् । उनले वार्ता र कूटनीतिको माध्यमबाट दीर्घकालीन शान्ति सुनिश्चित हुने स्पष्ट पारिन् ।

सो वार्तामा कतारका प्रधानमन्त्री एवं परराष्ट्रमन्त्री अल थानीले नेपाल र कतारबीचको सुमधुर, प्रगाढ र मित्रवत् सम्बन्धको उच्च प्रशंसा गर्दै  कतारमा रहेका नेपाली नागरिकहरुलाई वर्तमान परिस्थितिमा कतारी नागरिकसरह सुरक्षा र संरक्षण दिने बताए । उनले वर्तमान परिस्थितिलाई दुर्भाग्यपूर्ण भन्दै आफ्नो मुलुकले सार्वभौमिकता र भूमिको सुरक्षाका लागि वा आत्मसुरक्षाका लागि मात्र प्रयास गरिरहेको जानकारी दिएको पनि प्रधानमन्त्रीको सचिवालयले जनाएको छ ।