वीरगञ्ज । वीरगञ्ज महानगरपालिकाका मेयर राजेशमान सिंहविरुद्ध पर्सा जिल्ला अदालतमा ४ वटा मुद्दा दर्ता भएको छ । जिल्ला सरकारी वकिलको कार्यालय पर्साले मेयर सिंहसहित ४ जनाविरुद्ध आज मुद्दा दायर गरेको हो ।

मेयर सिंहले अर्काकी छोरीलाई आफ्नो छोरी भनी किर्ते जन्मदर्ता गराई त्यसैका आधारमा नागरिकता र राहदानी लगायत सरकारी कागजात बनाइदिएको आरोपमा मुद्दा दायर भएको हो ।

Watch On

जिल्ला सरकारी वकिल कार्यालय पर्साका सूचना अधिकारी अनन्तराज न्यौपानेले मेयर सिंहलाई समेत प्रतिवादी बनाई मुद्दा दायर गरिएको जानकारी दिए ।

त्यस्तै, पर्सा जिल्ला अदालतका श्रेस्तेदार प्रभाकरकुमार मल्लिकले पनि लिखत किर्तेमा २ र नागरिकता किर्तेमा २ गरी चार वटा मुद्दा दायर भएको जानकारी दिए । ‘केही परिवर्तित नाम छन्’ उनले भने ‘मुद्दामा मेयर र वडाध्यक्षलाई पनि प्रतिवादी बनाइएको छ।’

लिखत किर्तेसम्बन्धी एउटा मुद्दामा वडाध्यक्ष भिखारी राय यादवलाई पनि  प्रतिवादी बनाइएको मल्लिकले जानकारी दिए ।

वीरगञ्ज छपकैया निवासी लियाकत मियाँले २०८० माघमा नै यसबारेमा अनुसन्धान गर्न भन्दै जिल्ला प्रहरी कार्यालय पर्सामा उजुरी दर्ता गराएका थिए । तर, प्रहरीले उक्त उजुरीमा अनुसन्धान नै नगरेपछि मियाँले उच्च अदालत जनकपुरको अस्थायी इजलास वीरगञ्जमा रिट निवेदन दिए । उनको निवेदनका आधारमा गत पुस १४ गते आवश्यक अनुसन्धान गर्न परमादेश जारी गरेको थियो ।

सोही परमादेशका आधारमा आधारमा जिल्ला प्रहरी कार्यालय पर्साले सरकारी वकिलको कार्यालय पर्सामा अनुसन्धान प्रतिवेदन पेश गरेको थियो । उक्त प्रतिवेदनको अधारमा सरकारी वकिलको कार्यालय पर्साले ४ वटा मुद्दा दायर गरेको सरकारी वकिलको कार्यालय पर्साले जनाएको छ ।

मेयर सिंहविरुद्ध उजुरी दर्ता हुँदा कोमल साह पर्सा प्रहरी प्रमुख थिए । त्यसपछि कुमोद ढुंगेल र गौतम मिश्र पनि पर्सा प्रहरी प्रमुख बने । अहिले प्रहरी उपरीक्षक सुदीपराज पाठक पर्सा प्रहरी प्रमुख छन् ।

२०८० पुसमा पत्रकार जियालाल साहले मेयर सिंह जोडिएको नागरिकता किर्ते प्रकरण सार्वजनिक गरेका थिए । 

यस्ताे थियाे प्रकरण:

EXCLUSIVE : नक्कली बाबु बनेर वीरगंजका मेयरले नै दिए नागरिकता