रविले इजलासमा न्यायाधीशलाई भने- म माथि हिरासतमा गैरकानुनी व्यवहार गरिएको छ

पोखरा। राष्ट्रिय स्वतन्त्र पार्टी (रास्वपा) का सभापति रवि लामिछानेले आफूमाथि हिरासतमा गैरकानुनी व्यवहार भएको गुनासो न्यायाधीशलाई गरेका छन् । 

Watch On

बिहीबार म्याथ थपका लागि जिल्ला अदालत कास्कीमा प्रहरीले उनलाई उपस्थित गराएको थियो । सो क्रममा रविले जिल्ला न्यायाधीश चन्द्रकान्त पौडेलसामु हिरासतमा आफूलाई गैर कानुनी व्यवहार गरिएको गुनासो गरेका हुन् । 

स्रोतकाअनुसार जिल्ला न्यायाधीश चन्द्रकान्त पौडेलको इजलासमा म्याद थपको बहस भैरहेका बेला लामिछानेले कानुनी व्यवसायीसँग सल्लाह गरेका थिए । सोही समयमा कास्की प्रहरी प्रमुख श्याम ओलियाले उनलाई रोक्न खोजेपछि लामिछानेले उठेर न्यायाधीशसँग समय मागे । 

‘न्यायाधीशले समय दिएपछि लामिछानेले प्रहरी हिरासतमा आफूलाई कठोर तरिकाले राखिएको,टर्चर गरिएकाे, कानुनी सल्लाहका लागि कानुनी कानुन व्यवसायी भेट्न पनि नदिइएको बताए,’ स्रोतले सिधाकुरासँग भन्याे, 'न्यायाधीशले लामिछानेको कुरा सुने तर त्यसमा कुनै प्रतिक्रिया दिएनन् ।’ 

म्याद थपको बहश सकिए पछि जिल्ला अदालत कास्कीले थप ७ दिन हिरासतमा राखेर अनुसन्धान गर्न अनुमति दिएको छ। लामिछानेलाई हिरासतमा राखेर अनुसन्धान गर्न म्याद थप भएसँगै रवि माथि राजनीतिक प्रतिशोध साधेको भन्दै विरोध प्रदर्शनमा रहेको सर्वसाधारणहरू उत्तेजित बनेका छन् ।   

उनीहरूले वाई चोकमा रहेको निषेधित क्षेत्र तोडेर अघि बढेपछि प्रहरीले बल प्रयोग गरेको सिधाकुरा सम्वाददाता विष्णु ढुङ्गाना र लक्ष्मण गिरीले बताएका छन् ।