भोटेकोशी बाढीमा बेपत्ता बुद्धिमानको ६० दिनपछि कुशको शव बनाएर दाहसंस्कार

उदयपुर । भोटेकोशीमा आएको बाढीमा बेपत्ता भएका उदयपुर कटारी नगरपालिका–५ सोक्लाका २० वर्षीय बुद्धिमान परियार ६० दिनसम्म पनि फेला नपरेपछि परिवारले कुशको प्रतीकात्मक शव बनाएर दाहसंस्कार गरेको छ।

Watch On

रसुवाको टिमुरेस्थित घट्टेखोलामा रहेको मोटरसाइकल ग्यारेजमा काम गर्न गएको करिब छ महिनापछि बुद्धिमान भोटेकोशीमा आएको बाढीमा परेर बेपत्ता भएका थिए। घटनापछि परिवार उनको अवस्था थाहा पाउने र जीवितै नभेटिए शव भए पनि फेला पर्ने प्रतीक्षामा थियो । तर, ६० दिनसम्म पनि कुनै अत्तोपत्तो नलागेपछि परिवारले हिन्दू धार्मिक परम्पराअनुसार कुशको प्रतीकात्मक शव बनाएर अन्तिम संस्कार गरेको हो।

बुद्धिमानकी आमा मिना परियारले छोराको अनुहारसमेत हेर्न नपाई दाहसंस्कार गर्नुपर्दा दुःख व्यक्त गरिन्। “कमाएर सुखसँग पाल्छु भन्दै कमाउन गएको छोराको मुखसमेत हेर्न नपाई दाहसंस्कार गर्नुपर्‍यो,” उनले भनिन्।

त्यस्तै, बुद्धिमानका बुबा खुसबहादुर परियारले अझै पनि छोरा फर्किने आशा मनमा रहेको बताए। “अझै पनि छोरा आउँछ कि भन्ने आश लाग्छ। तर, ६० दिन बितिसक्यो, अब कसरी मन बुझाउनु?” उनले भावुक हुँदै भने।

हिन्दू धार्मिक परम्पराअनुसार शव फेला नपरेको अवस्थामा कुशबाट प्रतीकात्मक शव बनाएर अन्तिम संस्कार गर्ने प्रचलन छ। सोही परम्पराअनुसार परिवारले दाहसंस्कार गरेको हो।