काठमाडौं। नेकपा माओवादी केन्द्रले सरकार विपक्षी दलका नेताहरूलाई छानीछानी मुद्दा हाल्ने र जेल पठाउने नियोजित काममा लागेको आरोप लगाएको छ।

पार्टीले शनिबार काठमाडौंमा आयोजना गर्न लागेको जनप्रदर्शनबारे जानकारी दिन बिहीबार पार्टी कार्यालय पेरिसडाँडामा आयोजित पत्रकार सम्मेलनमा बोल्दै प्रवक्ता अग्नि सापकोटाले यस्तो बताएका हुन् । 

‘अहिलेको सरकारले विपक्षी दलका नेता र व्यक्तिलाई छानीछानी मुद्दा हाल्ने र जेल पठाउने काम गरिरहेको छ,’ प्रवक्ता सापकोटाले भने, ‘ काङ्ग्रेसका धनराज गुरुङ र एमालेका ऋषिकेश पोखरेल लगायतलाई प्रमाण हुँदाहुँदै पनि खुल्ला रूपमा संरक्षण गरिएको छ ।’ 

सरकारका कदमहरू ठिक ठाउँमा नभएको देखिएपछि पार्टीले खबरदारी गर्न लागेको प्रवक्ता सापकोटाले बताए । उनले पार्टीको बागमती प्रदेशले गर्ने खबरदारी सभामा सहभागी हुन समेत सबैमा अपिल गरे । 

प्रवक्ता सापकोटाले देशलाई प्रतिगमनबाट रोक्न र प्राप्त उपलब्धीको रक्षा गर्न खबरदारी सभा आवश्यक रहेको बताए । माओवादीले अहिलेको सरकारको उद्देश्य जनतालाई प्रभावकारी सेवा प्रदान गर्ने नभइ निहित स्वार्थ समूहको हित रक्षा गर्ने कुरा प्रष्ट भएको जनाएको छ । 

त्यस्तै प्रवक्ता सापकोटाले अहिलेको सरकारले पक्षपातपूर्ण व्यवहार गरिरहेको र सुशासनको मामिलामा दोहोरो मापदण्ड अपनाएको आरोप लगाए । माओवादीले कार्तिक १० गते सुन्धराबाट प्रदर्शनसहितको र्‍याली निकाल्ने र काठमाडौंको प्रदर्शनीमार्गमा खबरदारी सभा गर्ने जनाएको छ ।