बिच चोकमा खुँडा हान्ने ‘रिगल’लाई १२ वर्ष कैद माफी दिनेहरु...

१८ असोज, काठमाडौं । असोज ३ गते संविधान दिवसमा राष्ट्रपति रामचन्द्र पौडेलले नेपालगञ्जका चेतन मानन्धरको हत्या गरेका ‘रिगल’ योगराज ढकालको १२ वर्ष कैद माफी मिनाहा गरिदिए । तरुण दल बाँके–३ का तत्कालीन सभापतिसमेत रहेका रिगलको योजनामा २०७२ असार २८ गते दिउँसो ३ बजे नेपालगञ्जको सुर्खेत रोडमा मानन्धरमाथि खुँडा प्रहार गरी हत्या भएको थियो । 

बिच रोडमा आफ्नै साथीको हत्या गरेपछि रिगल भारत भागेका थिए । गुन्डा नाइकेहरूविरुद्ध प्रहरीले इन्काउन्टर श्रृङ्खला चलाएपछि भदौ २ गते मात्रै ‘रिगल’ले अदालतमा आत्मसमर्पण गरेका थिए । बाँके जिल्ला अदालतका न्यायाधीश विष्णु सुवेदीको इजलासले २०७५ वैशाख ११ मा चेतनको हत्याको मुख्य योजनाकार ठहर गर्दै सर्वस्वसहित जन्मकैदको सजाय सुनाएको थियो ।

अदालतको फैसला अनुसार रिगल २० वर्ष कारगार बस्नुपर्ने थियो । तर नेपाली कांग्रेससहितको गठबन्धन  सरकारले उनलाई ८ वर्ष भन्दा धेरै सजाय भुक्तान गर्नै नपर्ने सुविधा दियो । 

सोहि अनुसार कारागार चलान भएको ८ वर्ष पुग्नासाथ उनलाई छुटाउन नेपाली कांग्रेसका नेताहरु नै लागि परेका थिए । संविधान दिवसका दिन माफी मिनाहा हुने भएपछि त्यसको लविङमा रिगलका आफन्त र नेताहरु लागेका थिए । 

रिगलको असल चालचलन भएको, ४० प्रतिशत कैदी भुक्तानी गरेको भन्दै घोराहीस्थित जिल्ला कारागार दाङ र जिल्ला प्रशासन कार्यालय दाङले भदौ १६ गते गृह मन्त्रालयमा सिफारिस गर्याे । 

सोही सिफारिस अनुसार गृह मन्त्रालयले मन्त्रीपरिषदमा प्रस्ताव लगेको थियो । गृहको प्रस्ताव सदर गर्दै मन्त्रिपरिषद्को बैठकले राष्ट्रपतिलाई रिगलको कैद मिनाहाको लागि सिफारिस  गरेको थियो । 

कसले गर्यो सिफारिस ?

३ बर्षअघि मात्रै जिल्ला कारागार दाङ घोराही सरुवा भएका रिगल १ कार्यकाल घोराही कारागारको चौकिदार भएका थिए भने छुट्नुपहिले नाइके भएर बसेका थिए । 

उनलाई दाङ कारागारका निमित्त जेलर नवराज शर्माले असल चाल चलन भएको, ४० प्रतिशत कैद भुक्तान गरिसकेको भन्दै माफि मिनाहाका लागि प्रस्ताव गरेका थिए । 

निमित्त जेलर शर्माका अनुसार कारागार विभागबाट भएको परिपत्र अनुसार भदौ १६ गते नै  रिगल सहित ४० प्रतिशत कैदी भुक्तान  गरेका ५ जना र ५० प्रतिशत कैद भुक्तान गरेका ७ जनाको कैद कट्टी तथा माफी मिनाहाको प्रस्ताव गरिएको थियो । 

उक्त प्रस्तावमा दाङका तत्कालिन निमित्त प्रमुख जिल्ला अधिकारी तथा हालका सहायक प्रमुख जिल्ला अधिकारी सावित्रि पुनले समेत सहमति दिएकी थिइन् । 

कारागारले ४० प्रतिशत कैद भुक्तान गरेका ५ जनालाई माफी मिनाहका लागि सिफारिस गरेपनि रिगल सहित २ जनाको मात्रै माफी मिनाहा भएको निमित्त जेलर शर्मा बताउँछन् ।  

निमित्त जेलर शर्मा र निमित्त प्रमुख जिल्ला अधिकारी पुनले हस्ताक्षर गरेर गृह मन्त्रालयलमा सिफारिस गरेका थिए । सोही सिफारिसका आधारमा गृह मन्त्रालयका  तर्फबाट उपप्रधान तथा गृह मन्त्री नारायणकाजी श्रेष्ठले मन्त्रिपरिषद्मा प्रस्ताव लगेका थिए । 

मन्त्रिपरिषद्को भदौ २९ गतेको बैठकले गृह मन्त्रालयको प्रस्ताव सदर गर्दै रिगल सहित ६७० जनाको कैद कट्टी तथा माफी मिनाहाका लागि राष्ट्रपति कार्यालयमा सिफारिस गरेको थियो ।

सोही सिफारिसका आधारमा राष्ट्रपति पौडेलले संविधान दिवसका दिन रिगलको १२ वर्ष कैद मिनाहा गरिदिए । श्रीमानको हत्यारालाई माफी दिएपछि चेतनकी श्रीमती भारती मानन्धर अहिले काठमाडौंमा रिले अनसनमा बसेकी छिन् । साथै उनले सर्वोच्च अदालतमा माफी मिनाहाका लागि सिफारिस गर्ने कारागार, जिल्ला प्रशासन कार्यालय, मन्त्रिपरिषद् तथा राष्ट्रपति कार्यालयलाई विपक्षी बनाएर रिट हालेकी छिन् । 

सम्बन्धित समाचार :

श्रीमानको हत्यारालाई माफी दिएको भन्दै भारतीको माइतिघरमा रिले अनसन

रिगलको सजाय मिनाहा गर्ने राष्ट्रपतिको निर्णयविरुद्ध सर्वोच्चमा रिट, फेरि थुनामा पठाउन माग

बलिन्द्र धारा आँशु बगाउँदै राष्ट्रपतिलाई भारतीको प्रश्न : मेरो ठाउँमा तपाईंको छोरी भएको भएपनि हत्यारालाई माफी दिनुहुन्थ्यो ?

हत्यारालाई माफी दिएर कानूनको दुरुपयोग भएको भन्दै रवि लामिछानेद्वारा राष्ट्रपतिलाई ध्यानाकर्षण

राष्ट्रपति ज्यू ! हत्यारालाई माफी दिएर पाप गर्नु भयो: भारती मानन्धर (भिडियाेसहित)