काठमाडाैँ : गत आइतबारदेखि काठमाडौँको माइतीघर मण्डलामा भेला भएर शान्तिपूर्ण आन्दोलन गरिरहेका स्थानीय तहका कर्मचारीहरूले आफूहरुको माग पूरा नहुन्जेसम्मका लागि पेन डाउन गरेर काम ठप्प पार्न देशभरका स्थानीय तहका कर्मचारीलाई आव्हान गरेका छन् ।

करिब एक हप्तादेखि आफूहरु आन्दोलनरत रहँदा आफूहरुको माग सम्बोधन गर्न सरकारले तत्परता नदेखाएका कारण शुक्रबारदेखि आन्दोलनलाई थप सशक्त बनाउन ७५३ वटै स्थानीय तहमा अत्यावश्यक बाहेकका सबै काम ठप्प पार्दै अनिश्चितकालिन पेन डाउन गर्न आव्हान गरेका हुन् ।

उनीहरु संसद्मा पेस हुने तयारीमा रहेको सङ्घीय निजामती ऐनप्रति असन्तुष्ट जनाउँदै आन्दोलनमा होमिएका हुन् ।

आन्दोलनरत कर्मचारीले स्थानीय तहमा स्थानीय तहकै प्रमुख प्रशासकीय अधिकृत हुनुपर्ने, तीनै तहमा समान वृतिविकास , अन्तर प्रदेश सरुवा, विना सहमति चकृय सरुवा प्रणाली , समायोजनका कर्मचारीको उचित व्यवस्थापन , उमेर हद र सेवा अवधि गणना , अस्थायी र करार कर्मचारीको व्यवस्थापन , सेवा सुरक्षाको सुनिश्चितता हुनुपर्ने लगायतका माग राखेका छन् । 

त्यस्तै उनीहरु स्थानीय तहका कर्मचारीको हितका लागि एक कल्याणकारी कोषको अनिवार्य व्यवस्था गरिनुपर्ने, तीनै तहका कर्मचारीहरूलाई वृत्ति विकासको समान अवसर हुनुपर्नेजस्ता माग राखेर आन्दोलनमा सहभागि भएका छन् ।