धाप ड्यामनजिकै जमिन भासिन थालेपछि ताल खोलेर बगाउन थालियो पानी

काठमाडौँ । विगत दुई–तीन दिनदेखि लगातार भइरहेको वर्षाका कारण एसियाली विकास बैंक (एडीबी)को सहयोगमा निर्माण भएको धाप ड्यामको तल्लोतर्फ पहिरो जाँदा सडक किनारमा निर्माण गरिएको ग्याबिन वाल भासिएको छ ।

Watch On

लगातारको वर्षापछि स्याडल ड्यामको तलतर्फ रहेको खोल्सीमा पहिरो गएको हो । प्राविधिक निरीक्षणका क्रममा खोल्सीको बहाव क्षेत्रमा स्काउरिङ (पानीको बहावले माटो तथा जमिन कटान गर्ने प्रक्रिया) भएको र ह्युम पाइपको जोर्नी फुटेर वालभित्रैबाट पानी चुहिँदा क्षति बढेको पाइएको छ ।

घटनापछि जल स्रोत तथा सिँचाइ विभागका महानिर्देशकको नेतृत्वमा प्राविधिक टोलीले स्थलगत निरीक्षण गरेको छ । २०८३ भदौ २६ गते गरिएको निरीक्षणमा नदी तथा जल उत्पन्न विपद् व्यवस्थापन तथा योजना एवं समन्वय महाशाखाका उपमहानिर्देशकहरू, इन्जिनियरिङ जियोलोजिस्ट तथा सिनियर डिभिजनल इन्जिनियरसहितको टोली सहभागी थियो ।

निरीक्षणमा नेपाली सेना, राष्ट्रिय निकुञ्जका प्रतिनिधि, स्थानीय वडा अध्यक्ष तथा एसियाली विकास बैंकका प्रतिनिधिहरूको समेत सहभागिता रहेको थियो ।

वर्षाका कारण थप क्षति हुन नदिन तत्काल अस्थायी उपायहरू अपनाइएको विभागले जनाएको छ । स्लोप स्थिरतामा असर परेको भू–भागभन्दा माथि चार स्थानमा अस्थायी ड्रेन निर्माण गरी वर्षाको पानीलाई सुरक्षित रूपमा डाइभर्ट गरिएको छ ।

त्यस्तै, पानी जमिनमुनि छिर्न सक्ने सम्भावित स्थानमा प्लास्टिक तथा त्रिपाल बिछ्याइएको छ । नेपाली सेनासँगको सहकार्यमा भासिएको क्षेत्रमा रहेको ओभरबर्डेन हटाउने कामसमेत भइरहेको छ ।

एहतियातका रूपमा धाप ड्याममा सञ्चित पानीको सतह घटाउन ४०० लिटर प्रतिसेकेन्डको दरले फुल क्यापासिटीमा २४ सै घण्टा पानी निकासी भइरहेको विभागले जनाएको छ ।

हालको अवस्थामा ड्यामको तल्लो तटीय क्षेत्रमा उल्लेख्य जोखिम नरहेको प्राविधिक टोलीको निष्कर्ष छ । तर, वर्षा अझै जारी रहेकाले आवश्यक सतर्कता अपनाउन आग्रह गरिएको छ ।

भासिएको भू–भाग स्थिर भएपछि टोबाटै ग्याबिन तथा स्लोप प्रोटेक्सनको दीर्घकालीन संरचनात्मक काम अघि बढाइने तयारी छ । घटनास्थलमा प्राविधिक टोलीलाई खटाइएको र अवस्थाको निरन्तर अनुगमन भइरहेको विभागले जनाएको छ ।

घटनाको थप विवरण तथा प्राविधिक अवस्थाबारे क्रमशः जानकारी सार्वजनिक गरिने बताइएको छ ।