२४ असोज, काठमाडौं । राष्ट्रिय स्वतन्त्र पार्टीका सभापति रवि लामिछानेले अख्तियार दुरुपयोग अनुसन्धान आयोगको कुनै डर बाँकी नरहेको टिप्पणी गरेका छन् । उनले ठूला भ्रष्टाचारका मुद्दामा अख्तियारको भूमिका माथि प्रश्न गर्दै अब अख्तियारको डर र भर दुबै नभएको बताएका हुन् । 

प्रतिनिधिसभा अन्तर्गतको राज्य व्यवस्था समितिमा आज अख्तियार दुरुपयोग अनुसन्धान आयोग ऐनलाई संसोधन गर्न बनेको विधेयकमाथि छलफल भएको थियो । उक्त छलफलको क्रममा बोल्दै लामिछानेले अख्तियारले ठूला माछा समाउनै नसकेको बताएका हुन् । अख्तियारले पछिल्लो समय सहसचिव र सचिव भन्दा माथिका कसैलाई मुद्दा नचलाएको भन्दै ठूला माछा खोई भनी प्रश्न गरे । 

उनले लडाकु शिविरमा भएको घोटालाको छानबिन, वाइडबडी खरिद प्रकरणमा सार्वजनिक लेखा समितिले ४ अर्ब अनियमितता भएको निष्कर्षसहित गरेको सिफरिस, स्वास्थ्य सामग्री खरिदमा भएको अनियमितता प्रकरण लगायतका ठूला काण्डहरुको छानबिन के भईरहेको छ भन्नेबारेमा अख्तियारबाट ठोस जवाफ नआएको पनि बताए । उनले प्रश्न गरे, ‘छानबिन हुँदैछ भन्ने रेडिमेड जवाफ कहिलेसम्म सुन्नुपर्ने हो ?’  

यो अवस्थाका कारण नागरिकस्तरमा अख्तियारको डर भएपनि उच्च ओहोदा र ठूला मान्छेहरुलाई अख्तियारको डर बाँकी नरहेको बताएका छन् । उनले भने, ‘कानून बनाउन कन्जुस्याईँ गरौँ भनेको होइन, भएको कानूनमा काम गरेका छौँ कि छैनौँ ?’ 

अख्तियारले दायर गरेको मुद्दाको संख्या निरन्तर घटेको र दोषी ठहर हुनेहरुको संख्या निकै कम रहेकाले अख्तियारको प्रभावकारिता घट्दै गएको मूल्यांकन गरे । एन्फामा तत्कालिन अध्यक्ष गणेश पराजुलीले भ्रष्टाचार गरेको औंंल्याउँदा अख्तियारले किन देखेन भनेर प्रश्न गरे ।