इजरायलमा 'हमास'को आक्रमण पछि बेपत्ता भएका कञ्चनपुरका विपिन जोशीलाई 'हमास'ले बन्धक बनाएको स्वदेश फर्किएका विद्यार्थीहरूले बताएका छन् ।

इजरायलको दक्षिणक्षेत्र स्थित किवुज अलुमिनुमा रहेका सुदूरपश्चिम विश्वविद्यालयका १७ जना विद्यार्थी मध्ये विपिन एक थिए । शुक्रबार बिहान उद्धार भएर नेपाल आएका विद्यार्थीहरूले पहिलो पटक 'हमास'ले विद्यार्थी बसेको ठाँउमा ग्रिनेड फालेका थिए । 'हमास'ले कोठामा फालेको ग्रिनेड विपिनलेनै बाहिर फ्याएका थिए । 

तर दोस्रो पटकमा फ्याँकेको ग्रिनेड पट्कीदाँ १० जनाको ज्यान गयो भने ४ जना घाइते भए । 'हमास'ले प्रहार गरेको ग्रिनेड फ्याँके लगत्तै उनलाई नियन्त्रणमा लिएको इजरायलबाट फर्कएकी बिबुशा अधिकारी बताउँछिन् ।

 यस्तै इजरायलको अस्पतालमा उपचाररत गोरखाका हिमाञ्चल कट्टेलका अनुसार विपिनलाई 'हमास'ले बन्धक बनाएका छन् । 'हमास'को आक्रमण घाइते भएका उनले विपिनलाई 'हमास'ले लगेर गएको आफूले देखेको बताएका छन् । 

त्यसपछि विपिनको अवस्था पत्तो लागेको छैन । अन्तराष्ट्रिय सञ्चारमाध्यमका अनुसार हमास समुहले इजरायली नागरिक सहित अन्य देशको नागरिकलाई पनि बन्धक बनाएको दाबी गरेका छन् ।

इजरायलमा 'हमास'काे आक्रमणपछि बेपत्ता विपिन जोशी कहाँ छन् ?

 मिडिया रिपोर्टका अनुसार इजरायली बाहेक ६ देखि ८ जना हमासको अपहरणमा परेका छन् जस मध्ये मेक्सिकन २ जना, ब्राजिलियन ३ जना, एक जना नेपाली विद्यार्थी र एक जना ब्रिटिस नागरिक छन् । साथै जर्मनी र थाइल्याण्डका ११ जना पनि हमासको अपहरणमा परेको आशंका अन्तराष्ट्रिय सञ्चारमाध्यमहरूले गरेका छन् । 

इजरायलबाट स्वदेश फर्किदै गरेका अधिकांश नेपाली विद्यार्थीहरूले यही रिपोर्ट शेयर गरेका छन् । उनीहरूले विपिनको अवस्था पत्ता लगाउन सबैसँग आग्रह गरेका छन् ।

विद्यार्थी लिन आफै इजरायलको तेल अभिभ विमानस्थल पुगेर फर्कीएका परराष्ट्र मन्त्री एनपी साउदले समेत विपिनको अवस्था पत्ता लगाउन कुनै अन्तराष्ट्रिय नियोगहरूलाई आग्रह गर्न सकेनन् । इजरायलस्थित नेपाली दुतावासका अधिकारीहरूले भने इजरायली सेना, रेडक्रस, ह्युमन राइट्सका अधिकारीहरूसँग समन्वय भैरहेको तर कतैबाट जानकारी प्राप्त नभएको बताउँदै आएका छन् । 

साथै अस्पतालहरु समेत विपिनको खोजी भैरहेको दुतावासको दाबी छ । अलजजिराका अनुसार अहिले ५ हजार भन्दा बढी प्यालेस्टाइनीहरु इजरायलको जेलमा छन् । जस मध्ये ३३ जना महिला र १७० जना बालबालिका छन् ।

हमासको अल कसाम बिग्रेडका प्रवक्ता अबु उबैदाले इजरायलमा आक्रमण गरि इजरायली जेलमा रहेका प्यालेस्टाइनीहरु छुटाउन पुग्नेगरि इजरायली सैनिकहरूलाई बन्धक बनाउन सफल भएको दाबी गरेको थियो ।

इजरायली सैन्य प्रवक्ता रियर एडम ड्यानियल हगारीले पनि हमासले इजरायलीहरुलाई बन्दक बनाएको स्विकार गरेका छन् तर उनले ति सैनिक हुन वा सर्वसाधारण पनि छन भने भन्न चाहेनन् ।

सार्वजनिक भैरहेको भिडियोहरूमा हमासका लडाकुहरूले मानिसहरूलाई निर्मम तरिकाले अपहरण गरेर गाडीमा कोचेको देखिन्छ भने महिलाहरूलाई समेत अमानवीय तरिकाले बन्धक बनाएर गाजा क्षेत्र तर्फ लैजाँदै गरेको देखिन्छ ।