चितवन । नेपाल विद्युत प्राधिकरणको कार्यकारी निर्देशकबाट कुलमान घिसिङलाई हटाएर सरकारको आलोचना भैरहेका बेला नेपाल विद्युत प्राधिकरण भरतपुर वितरण केन्द्रको बोर्ड सरकारकै विरोधका शब्द डिस्प्ले भएका छन् । 

अहिले सामाजिक संजालमा नेपाल विद्युत प्राधिकरण, भरतपुर वितरण केन्द्रको डिजिटल डिस्प्ले बोर्डमा 'केपी चोर देश छोड'जस्ता आपत्तीजनक शब्द डिस्प्ले भएको फोटो भाइरल भएको छ । 

विद्युत प्राधिकरण भरतपुर वितरण केन्द्रका अनुसार हिजो दिउसोँबाट आज बिहानसम्मै यस्तो पोष्ट डिस्प्ले भैरहेको थियो । वितरण केन्द्रका डिस्प्ले बोर्डमा प्रधानमन्त्री विरुद्ध आपत्तीजनक शब्द लामो समय सम्म प्रसारण भएपछि आक्रोशित नेकपा एमालेका नेता कार्यकर्ताले कार्यालय प्रमुख माथि हातपात गरेका छन् । 

कार्यालयको गैरजिम्मेवारीलाई ध्यानकर्षण गराउन वितरण केन्द्रपुगेका अनेरास्ववियु चितवनका कार्यकर्ताहरुले वितरणकेन्द्र प्रमुख रामु श्रेष्ठलाई हातपात गरेका हुन् । वितरण केन्द्र प्रमुख श्रेष्ठले भने ह्याक भएर आपत्तीजनक शब्द डिस्प्ले भएको दाबी गरेका छन् । साथै उनले ह्याक कसरी भयो भन्नेबारे सोधखोज गरिरहेको बताए । 
घटना बाहिरिएपछि चितवनका प्रमुख जिल्ला अधिकारी प्रकाश पौडेलले वितरण केन्द्र प्रमुखलाई २४ घण्टे स्पिष्टीकरण सोधेका छन् । 

प्रजिअ पौडेललाई पनि वितरण केन्द्र प्रमुख श्रेष्ठले ह्याक भएको प्रतिक्रिया दिएपनि औपचारिकरुपमा विज्ञप्ती सार्वजनिक गर्न लगाएका छन् । तर श्रेष्ठले विज्ञप्ती भने निकालेका छैनन् ।  प्राधिकरणको डिस्प्ले बोर्डमा विद्युत प्राधिकरण वितरणकेन्द्र भरतपुरका कार्यालय प्रमुख श्रेष्ठले नै कन्टेन्ट हाल्ने गरेका छन् । यसको पासवर्ड उनीसँग मात्रै छ । तर उनले आफूले कन्टेन्ट नहालेको दाबी गरे । उनले कसैले ह्याक गरेर त्यस्तो लेखेको दाबी गरे ।