सुरेश रजकका परिवारलाई मानव अधिकार आयोगको सान्त्वना, ‘गहिराईमा पुगेर अनुसन्धान गरेका छौँ, ढिला भएकोमा क्षमा चाहन्छौँ’

काठमाडौँ । राष्ट्रिय मानव अधिकार आयोगले तीनकुने घटनामा आफूहरूले मिहिन अनुसन्धान गरेको बताएको छ । आइतबार तीनकुने घटनामा मृत पत्रकार सुरेश रजकका परिवारसँग कुराकानी गर्दै राष्ट्रिय मानव अधिकार आयोगकी अनुशन्धान महाशाखा प्रमुख मञ्जु खतिवडाले आफूहरूले उक्त घटनाको अनुसन्धान पूरा गरिसकेको बताइन् । 

मृतक रजकका परिवारले घटना घटेको २ महिना बित्दासमेत कुनै निकायले पनि अनुसन्धान नसकेको र न्याय नमिलेको भन्दै मानव अधिकार आयोग गुहार्न पुगेका थिए । उनीहरूसँग कुराकानी गर्दै खतिवडाले आफूहरूले अन्य घटनाभन्दा तीनकुने घटनालाई प्राथमिकता दिएर अनुसन्धान गरेको बताइन् । ‘तीनकुने घटनालाई निरन्तरको अनुसन्धानभन्दा पनि एकदमै फास्ट ट्र्याकमा लगेर अनुसन्धान गर्छौँ भनेर हामीले भनेका थियौँ । सोहीअनुसार गत शुक्रवार हामीले अनुसन्धान सक्काएर रिपोर्ट दर्ता समेत गरिसकेका छौँ । हामी अहिले प्रिन्टमा व्यस्त छौँ ।’, खतिवडाले पीडित परिवारसँग भनिन् । 

त्यस्तै उनले आफूहरूले उक्त घटनाको अध्ययन गर्न चिकित्सकसहितको विशेषज्ञ टोली झिकाएर विस्तृत अनुसन्धान गरेको बताइन् । खतिवडाले भनिन्, ‘हामीले सो घटनामा आफ्नो विज्ञता नपुगेर बाहिरबाट विज्ञ झिकाएर अनुसन्धान गरेका थियौँ । हामीले सतही भन्दा पनि गहिरोमा पुगेर अनुसन्धान गर्नुपरेका कारण केही समय लागेको हो । ढिला भएकोमा हामी क्षमाप्राथी छौँ ।’

त्यस्तै मृतक सुरेशका परिवारले प्रहरीले २ जना आन्दोलनकारी गएर आगो लगाएको र त्यहीँ परेर सुरेशको मृत्यु भयो भनिरहेको  अवस्थामा आफूहरू उक्त कुरामा मान्न तयार नभएको बताए । उनीहरूले भने, ‘प्रहरीले त आन्दोलनकारीले आगो लगाए । त्यही आगोमा परेर उनको मृत्यु भयो भनिरहेको छ । तर हामीलाई त्यति मात्रै हैन जस्तो लाग्छ ।’

यसको जवाफमा खतिवडाले आफूहरूले त्यस विषयलाई समेत विश्लेषण गरेर प्रतिवेदन तयार गरेको बताइन् । त्यस्तै रजकले रिपोर्टिङका क्रममा प्रयोग गरेको एउटा फोन र क्यामेरा समेत नभेटिएको उनले बताइन् । 

आयोगले तीनकुने घटनामा अनुसन्धान प्रक्रिया पूरा गरिसकेको र केही दिनमा निष्कर्ष सार्वजनिक गर्ने बताएको छ ।