मकवानपुर ।  ललितपुर महानगरपालिका २५ सुगम टोलस्थित नख्खु खोलामा गत असोज १२ गतेको बाढीमा बग्दै गरेका दुई जनाको सकुशल उद्दार गरेका काभ्रे तेमालका चणिकलाल तामाङलाई डेढलाख ?पैयाँ नगदसहित बागमती प्रदेश सरकारले सम्मान गरेको छ । बागमती प्रदेश सरकारले गणतन्त्र दिवसको अवसरमा सम्मान गरेको हो । काभ्रेको तेमाल गाउँपालिका– ९ चोकटारका तामाङले गत असोज १२ गते आएको अबिरल बर्षाको कारण आएको बाढीमा नख्खु खोलामा बग्दै गरेका रौतहटका राजु साहकी छोरी ६ बर्षीया मेघना साह र राजुका भाइ २२ बर्षीय राज साहको जोखिम मोलेर उद्दार गरेका थिए । 

पेशाले पेन्टर रहेको लामाङले बाढीमा बगेकालाई किनारमा ल्याएर भुइँमा सुताई पालैपालो पेटमा थिचेर बाढीमा खाएको पानी निकालेर उनीहरुको ज्यान बचाएका थिए । वर्षाका कारण सो दिन पेन्टिङको काम रोकिएपछि उनी वरपर बाढीको कहर हेर्न निक्लेका थिए । सोहि समयमा नै उनले बाढीमा बगेकालाई उद्दार गर्न सफल भएका हुन् । 

गणतन्त्र दिवसको अवसरमा गत बैशाख १९ गते हेटौंडा वडा नम्बर १६ स्थित गैरीगाउँमा जमिनमा भासिएर बेपत्ता भएको गाडी वडा कार्यालयको पहलमा उत्खनन् गरेर गाडी बाहिर निकाल्ने कार्य गरेकाले हेटौंडा वडा नम्बर १६ का वडाध्यक्ष रामकृष्ण कोईरालालाई पनि सम्मान गरेको थियो ।

 
बागमती प्रदेश सरकारले गणतन्त्र दिवसको अवसरमा प्रदेशमा विशिष्ट कार्य गर्ने निजामति कर्मचारी, सुरक्षा निकायका कर्मचारी, पत्रकार, विभिन्न साँस्कृतिक समूहलगायतलाई सम्मान गरेको थियो । प्रदेश प्रमुख दीपकप्रसाद देवकोटाको प्रमुख आतिथ्यतामा भएको कार्यक्रममा मुख्यमन्त्री बहादुरसिंह लामा, प्रदेशका मन्त्री, प्रदेश सभा सदस्यहरु, जिल्ला स्थित कार्यालय प्रमुखहरुको उपस्थिति रहेको थियो ।