महानागर यातायातले सुरु गर्यो विद्युतीय वस सेवा

काठमाडौँ । महानगर यातायात प्रालिले विद्युतीय वस सेवा सुरु गरेको छ । प्रालिले आजैदेखि काठमाडौंको चक्रपथमा गुड्ने गरि चेरी एण्ड वण्डा ब्राण्डको १२ वटा विद्युतीय सिटी वसको सेवा सुभारम्भ गरेको हो । चिनीयाँ वस उत्पादक कम्पनी चेरी एण्ड वण्डाको नेपालका लागि आधिकारिक विक्रेता शशीला मोटर्स प्रा.लि. ले आज काठमाडौंमा आयोजित एक समारोहमा महानगर यातायातलाई वसको चावी हस्तान्तरण गरेको छ ।
 
सो अवसरमा विद्युतीय वस सेवाको औपचारिक उद्घाटन गर्दै भौतिक पूर्वाधार तथा यातायात मन्त्री देवेन्द्र दाहालले महानगर यातायातले सार्वजनिक यातायातको क्षेत्रमा गरेको पहल सह्रानीय भएको बताए । काठमाडौंमा साना सवारी साधनहरुलाई दुरुत्साहन गरि यस्ता ठूला वसहरुलाई प्रोत्साहन गर्नु आफ्नो प्राथमिकता रहेको भन्दै मन्त्री दाहालले महानगर यातायातलाई आवश्यक सहयोग गर्न सरकार तयार रहेको प्रतिवद्धता ब्यक्त गरे । सार्वजनिक यातायात र सडक पूर्वाधारको स्तर उन्नतीतर्फ आफू केन्द्रित रहेको उनको दावी थियो । 

Watch On

कार्यक्रममा महानागर यातायात प्रा.लि. का कार्यकारी अध्यक्ष सन्तोष खतिवडाले विश्वब्यापी रुपमा आइरहेको विद्युतीय गाडीको लहर र नेपालको सन्दर्भमा त्यसको ब्यवहारिक पक्षको अध्ययन पश्चात विद्युतीय वसहरु भित्र्याएको जानकारी दिए । अहिले सेवा सुभारम्भ गरिएका विद्युतीय वसहरु नेपालको सडक पूर्वाधार सुहाउँदो भएको र निकट भविष्यमै यस्ता विद्युतीय वसहरुको संख्या बढाउने योजनामा रहेको अध्यक्ष खतिवडाको भनाइ थियो । उनले विद्युतीय बसहरु वातावरण मैत्री र यात्रु मैत्री मात्रै नभएर ब्यवसायीका लागि समेत लाभदायी हुने विश्वास पनि ब्यक्त गरे ।
 
कार्यक्रममा शशीला मोटर्सका महाप्रबन्धक अशोकराज सुवेदीले महानगर यातायातलाई आज हस्तान्तरण गरिएको विद्युतीय सिटी वसहरु नेपालको पूर्वाधारको अध्ययन पश्चात मात्रै ल्याइएको जानकारी दिए । वस उत्पादक चिनीया कम्पनी चेरी एण्ड वण्डाको रिसर्च एण्ड डेभलपमेन्ट टिम नेपालमै आएर यहाँको बाटोघाटो अध्ययन गरेपछि नेपालकै लागि बनाइएको बस भएको हुनाले ब्यवसायीको हितमा र यात्रु मैत्री रहेको उनको दावी थियो । 

आज देखि संचालनमा आएको उक्त विद्युतीय वस ८ दशमलव ६५ मिटर लम्बाइका छन् । जुन वसमा ३२ जना यात्रुका लागि आरामदायी सिटका साथै ३५ जना सम्म यात्रु उभिएर जम्मा ६७ जना यात्रु क्षमता रहेको छ भने चालकका लागि छुट्टै कुनै अवरोध नहुने गरि चालक क्याविनको ब्यवस्था गरिएको छ । वसमा अत्याधुनिक फोल्डिङ एडजस्टेवल आरामदायी सिट प्रदान गरिएको छ । चालक क्याविनमा दिइएको स्क्रिनमा वसमा भएका सम्पूर्ण गतिविधिहरु सात वटा सिसि टिभी क्यामरा मार्फत नियाल्न सकिने भएकोले सुरक्षित रहेको छ ।  

वसमा डवल एयर सप्सेन्सन रहेको हुनाले यात्रुहरुलाई आरामदायी यात्रा सुनिश्चित हुनेछ । जसले सडकमा भएका खाल्डा खुल्डीहरुमा पनि सजिलै यात्रा गर्न सकिनेछ भने यात्रुहरुलाई लामो दुरीको यात्रामा पनि कुनै थकान नहुने कम्पनीको दावी छ । 
दश वर्षदेखि काठमाडौंमा संचालित महानगर यातायातले यसअघि ८९ वटा वसमार्फत सेवा दिइरहेको थियो । विद्युतीय सेवा विस्तारसंगै महानगर यातायातको वस संख्या १ सय १ पुगेको छ । महानागर यातायातले यस अघि नै निकट भविश्यमै आफूलाई पब्लिक लिमिटेड कम्पनी बनाउने घोषणा गरिसकेको छ ।