काठमाडौँ । नेपाल आयल निगमको सिनामंगल स्थिति त्रिभुवन अन्तर्राष्ट्रिय विमानस्थल, हवाई इन्धन डिपोलाई गुह्येश्वरी स्थित नेपाली सेनाको गल्फ कोर्समा स्थानान्तरण गर्नेसम्बन्धी परियोजनाको डिपिआर तयार भएको छ । 

बिहीबार काठमाडौंमा आयोजित एक कार्यक्रमकाबीच त्रिभुवन विश्वविद्यालय इन्जिनियरिङ अध्ययन संस्थान कन्सल्टेन्सी सेवाद्वारा तयार पारिएको डिपिआर निगमको हवाई इन्धन डिपो सिनामंगललाई हस्तान्तरण गरिएको हो ।

हवाई इन्धन डिपोलाई सेनाको गल्फ कोर्समा स्थानान्तरणका लागि विस्तउत परियोजना प्रतिवेदन बनाउने सम्बन्धमा गत मंसिर ५ गते निगमले इन्जिनियरिङ अध्ययन संस्थान सम्झौता गरेको थियो । प्रस्तावित निर्माण हुने डिपो अत्याधुनिक तथा पूर्ण रूपमा स्वचालित एल ३ लेबल अटोमेसनयुक्त हुने र डिपोमा इन्धन भण्डारणको लागि हाल ३००० किलोलिटर क्षमताका ५ वटा भर्टिकल ट्याङ्कीको निर्माण हुने छन् । त्यस्तै भविष्यमा भण्डारण क्षमता बढाउनको लागि समेत खाली स्थान निर्माण हुने नेपाल आयल निगम लिमिटेड हवाई इन्धन डिपो सिनामंगलका कार्यालय प्रमुख प्रदिप कुमार यादवले जानकारी दिए । 

डिपोमा अग्नि सुरक्षाका लागि २१०० किलोमिटर क्षमताका २ वटा स्ट्याटिस वाटर ट्याङ्की र पूर्ण स्वचालित फाइटिङ सिस्टम समेत जडान हुने निगमले जनाएको छ ।

निर्माण हुन लागेको डिपोको निर्माण लागत ६ अर्ब ५४ करोड २९ लाख अनुमान गरिएको छ । यसै आर्थिक बर्षको मंसिर महिनामा निर्माण कार्य सुरुगरि दुई बर्षभित्रमा निर्माण सम्पन्न गरि डिपो सञ्चालन गर्ने योजना रहेको निगमले जनाएको छ ।