अपडेट: उत्तराखण्डको उत्तरकाशीमा आएको बाढीमा सम्पर्कबिहिन हुने नेपालीकाे संख्या २२ पुग्याे

काठमाडौँ । भारतको उत्तराखण्ड राज्यअन्तर्गत उत्तरकाशीको हर्सिल क्षेत्रमा मङ्गलबार दिउँसो आएको बाढीमा परेर नेपालका २२ जना बेपत्ता भएका छन् । बेपत्ता हुनेमा जाजरकोटका १३ जना, बर्दियाका ४ जना, धादिङका ४ जना र जुम्लाका १ जना रहेका छन् । 

Watch On

उक्त बाढीमा परेर कुशे गाउँपालिका–२ का १३ जना बेपत्ता भएका हुन् । कुशे गाउँपालिकाले विज्ञप्ति जारी गर्दै भारतमा मजदुरी गर्न गएका स्थानीय बासिन्दा बाढीपछि सम्पर्कमा नआएको जनाएको छ । 

गाउँपालिकाका अध्यक्ष हरिचन्द्र बस्नेतले बेपत्ताको खोजी गरिदिन  परराष्ट्र मन्त्रालयसँग अनुरोध गरेका छन् । सोही क्षेत्रमा मजदुरी गर्दै आएका कुशे गाउँपालिकाका अन्य वडाका बासिन्दा पनि सम्पर्कमा नरहेको अध्यक्ष बस्नेतले बताए । 

त्यस्तै बर्दियाको मधुवन नगरपालिका–६ निवासी करिब ४० वर्षीय नरेन्द्र खड्का, उनकी श्रीमती ३२ वर्षीया सरस्वती खड्का, दुई वर्षीय छोरा रोमन खड्का तथा मधुवन नगरपालिका–५ की अमृता परियार  बेपत्ता भएका छन् । उनीहरु पनि कामको खोजीमा भारत पुगेका थिए । उनीहरुको खोजी तथा उद्धारका लागि लुम्बिनी प्रदेशका मुख्यमन्त्री चेतनारायण आचार्यले संघीय सरकारलाई आग्रह गरेका छन् । 

त्यस्तै धादिङको ज्वालामुखी गाउँपालिकाका ४ जना पनि सोही बाढीपछि सम्पर्कबिहिन भएका छन् । जिल्ला प्रशासन कार्यालय धादिङका अनुसार ज्वालामुखी गाउँपालिका वडा नम्बर २ काफलपानी ठेगाना भएका लालबहादुर तामाङ, छोलामा तामाङ,  फेलामा तामाङ र सिंहबहादुर तामाङ सम्पर्कविहीन भएका हुन् । 

त्यस्तै जुम्लाका पनि एक जना बेपत्ता भएका छन् । 

जिप्रका धादिङले पनि खोजीका लागि गृह मन्त्रालयमार्फत भारतीय दुतावासलाई आग्रह गरेको छ । 

भारतको उत्तराखण्ड राज्यको उत्तरकाशी जिल्लामा मंगलबार राति परेको अत्यधिक वर्षा पश्चात् आएको बाढी र पहिरोका कारण सयौँ मानिस बेपत्ता भएका छन् । हिलो र पानीको तीव्र बहावले बस्तीहरूमा ठूलो विनाश गरेको बिभिन्न भिडियोहरु सार्वजनिक भएका छन् ।