ठगिए रोजगारीका लागि माल्दिभ्स गएका युवा, ठग्नेलाई जोगाउन सरकार नै मिल्यो !

काठमाडौँ । बैदेशिक रोजगारीमा ठगिएर न्याय माग्न गएका युवाहरु उल्टै सरकारी निकायबाटै ठगीएका छन् । म्यानपावर व्यवसायीसँग मिलेर वैदेशिक रोजगार विभागले ठगीमा संलग्नहरुलाई जोगाउन उजुरी नै गायब बनाएको पीडितहरुको आरोप छ । 

यो घटना गत महिनाको हो । काठमाडौँको फरएभर ह्युमन रिसोर्स सोलुसन प्रालिबाट माल्दिभ्स पुुगेका खोटाङ ऐसेलु खर्कका नौला सिंह विश्वकर्माले विभागमा उजुरी दिएका थिए ।   म्यानपावर कम्पनीका सञ्चालकहरु रविन्द्र राई, सुमन राई, उर्मिला राई र विशेष राई विरुद्ध साउन ६ गते उनीहरुले विभागमा उजुरी दर्ता गराएका थिए । उनीहरुको उजुरी नम्बर ७८ हो । 

तर त्यो फाइल अहिले विभाग रेकर्डमा भेटिदैन । विभागमा म्यानपावर सञ्चालकहरुको पहुँचका कारण कर्मचारीसँगको मिलोमतोमा यस्तो भएको पीडितहरु बताउँछन् । खोटाङ ऐसेलु खर्कका ३५ वर्षीया नौला सिंह विश्वकर्मा फरएभर ह्युमन रिसोर्स सोलुसनमार्फत दुई महिना अघि माल्दिभ्स पुगेका थिए । 

उनलाई गाउँकै छिमेकीले माल्दिभसमा अकर्षक रोजगारीको अवसर भएको सुनाएका थिए । विमानस्थलको जागिर, चार सय डलर बढीको तलब र अन्य सुबिधा पनि भएको प्रलोभन पछि उनी काठमाडौँ आए ।

काठमाडौँको टोखा १० सामाखुसी स्थीत फरएभर ह्युमन रिसोर्स सोलुसनलाई चार लाख ५० हजार रुपैयाँ नगद बुझाएर उनी माल्दिभ्स पुगे । 

तर, माल्दिभ्समा विश्वकर्माले नेपालमा म्यानपावर र त्यसका एजेन्टले भनेको जस्तो केही पनि पाएनन् । उनलाई मेनपावरले भने जस्तो न काम दियो नत ज्याला नै । एक महिना १७ दिन माल्दिभ्समा बिताएर उनी केहिदिन अघि नेपाल फर्किए ।  

फरएभर ह्युमन रिसोर्स सोलुसनबाटै बैदेशिक रोजगारीमा गएर ठगिने नौला सिंह मात्र होइनन् । पाल्पा पूर्वखोला गाउँपालिकाका टोप बहादुर बारघरे अर्का पीडित हुन् । उनी पनि त्यस्तै प्रलोभनमा परेर माल्दिभ्स पुगेको थिए । म्यानपावर कम्पनीलाई चार लाख नगद बुझाएर माल्दिभ्स पुगेको बारघरे पनि माल्दिभ्स पुगेको केहि दिनमै नेपाल फर्किनुपर्यो । 

दुइ महिना पहिले मोरङका खगेन्द्र लिम्बु पनि यही म्यान पावरलाई ४ लाख ५० हजार रुपैयाँ तिरेर माल्दिभ्स पुगेका थिए । उनले पनि त्यस्तै समस्या झेल्नुपरेपछि गत शनिबार नेपाल आइपुगेका छन् । 
माल्दिभ्समा कम्पनिको काम भनेर पठाए पनि त्यस्तो केही भएन  समस्या बताउँदा म्यानपावर कम्पनी नै सम्पर्कबिहिन भएको उनी बताउँछन् । उतै अलपत्र परेपछि परिवारले नेपालबाट बाख्रा बेचेर पैसा पठाइदिएको र सोहीबाट टीकट काटेर आफूू नेपाल आएको लिम्बु बताउँछन् । 

भोजपुरका भविन मगरको व्यथापनि उस्तै छ । माल्दिभ्सको सडकका गल्लीमा दुई महिना भौतारिएर काम खोज्दा पनि  नपाए पछि शनिबार नेपाल आइपुगेको उनी सुनाउँछन् । फरएभर ह्युमन रिसोर्स सोलुसन प्रालिले त्यहाँ धेरैलाई यसरी नै अलपत्र पारेको उनी बताउँछन् । 

वैदेशिक रोजगारीको शिलशिलामा दुःख पाएका तथा ठगिएका नागरिकले न्यायका लागि गुहार्ने पहिलो न्यायिक निकाय हो वैदेशिक रोजगार विभाग । सोही अनुसार आफूलाई बिभिन्न बहाना बनाएर ठगी गर्ने म्यानपावर फरएभर ह्युमन रिसोर्स सोलुसनविरुद्ध नौला सिंह विश्वकर्माले साउन ६ गते विभागमा उजुरी दर्ता गराएका थिए । 

तर, लामो समयसम्म पनि प्रक्रिया अघि बढेको संकेत नपाएपछि उनी केही दिनअघि विभागमा बुझ्न पुगेका थिए । तर, उनले त्यहाँ पुगेपछि थाहा पाए उनले दर्ता गराएको उजुरीको फाइल नै गायब भईसकेको रहेछ ।

अगाडी गरेको उजुरीको दर्ता नम्बर समेत लिएर बैदेशिक रोजगार विभाग पुग्दा आफुले दर्ता गराएको उजुरीको फाइलनै हराएको खबर पाएपछि उनी चकित परे । 

मेनपावर र तिनका एजेन्टको वैदेशिक रोजगार विभागको कार्यालयमा सोझो पहुँच हुदा वैदेशिक रोगारमा ठगिएकाहरुले गरेको उजुरी हराउने गरेको पीडितहरु बताउँछन् । उजुरी हराउने विषयमा वैदेशिक रोजगार विभागका प्रवक्ता चन्दबहादुर शिवाकोटी यसो भन्छन् । 

विदेश जाँदा भएको खर्च मेनपावरले फिर्ता दिने आशामा पीडितहरु न्याय दिने सरकारी अड्डामा मेनपावरकै पहुँच देखेपछि निराशा बनेका छन् । 

आफूहरुलाई म्यानपावर कम्पनीले समेत धम्की दिएको पीडितहरु बताउँछन् । सकेको गर भन्ने धम्की दिने गरेका छन् एक पीडितले सिुधाकुरासँग भने । 

पीडितहरुले आफ्नो पैसा माग्न जाँदा उल्टै म्यानपावर सञ्चालक तथा कर्मचारीले थर्काउने गरेको आरोप लगाए । 
तर, यस विषयमा कुरा गर्न सिधाकुराले म्यानपावर कम्पनीमा सम्पर्क गर्दा म्यानपावरका सञ्चालक रििवन्द्र राइ आफूले पठाएको नभएर कर्मचारीले पठाएको भन्दै पन्छिन खोजे ।