रास्वपाको सचिवालय बैठकले के गर्यो निर्णय ?

काठमाडौँ । राष्ट्रिय स्वतन्त्र पार्टी (रास्वपा)ले जेनजी पुस्ताका धेरै नागरिकहरू मतदाता नामावलीमा सूचीकृत नभएको अवस्थालाई ध्यानमा राख्दै मतदाता नामावली दर्ताको लागि राष्ट्रिय र अन्तर्राष्ट्रिय रूपमा अभियान सञ्चालन गर्ने निर्णय गरेको छ । रास्वपाका प्रवक्ता मनिष झाका अनुसार बिहीबार बसेको सचिवालय बैठकले मतदाता नामावली सम्बन्धी थप निर्णय पनि गरेको छ । 

रास्वपाले  प्रवासमा रहेका नेपाली नागरिकहरूको मतदाता नामावली दर्ता प्रक्रिया पूर्णरूपमा अनलाइनबाट गर्ने व्यवस्था मिलाउन, नेपालका विदेशस्थित दूतावास÷कन्सुलेट तथा नेपालका अन्तर्राष्ट्रिय विमानस्थलहरूका आगमन र प्रस्थान दुवै क्षेत्रबाट बायोमेट्रिक सेवा उपलब्ध गराउने व्यवस्था गर्न सम्बन्धित निकायलाई प्रस्ताव गर्ने निर्णय गरेको छ । 

यस्तै गत भदौ २३ र २४ गते जेनजीहरुको आन्दोलनपछिको संवेदनशील विषयलाई केन्द्रमा राख्दै “सद्भाव तथा सहकार्य अभियान” प्रारम्भ गर्ने निर्णय समेत बैठकले गरेको छ । त्यस्तै पार्टीले स्थापनाकालदेखि नै उठाउँदै आएको विशेष एजेन्डा र  बाचापत्रको प्रमुख मुद्दा “विदेशमा रहेका नेपाली नागरिकलाई मतदान गर्ने अधिकार” प्रति वर्तमान सरकारले देखाएको चासोलाई स्वागत समेत गरेको छ । 

पार्टी आफैले उठाएको मुद्दा र  यस प्रक्रियाको ब्लुप्रिन्ट पार्टीसँग भएका कारणले यस सम्बन्धमा पार्टी अन्तरिम सरकारलाई आवश्यक सहयोग गर्न प्रतिबद्ध रहने रास्वपाले जनाएको छ । साथै रास्वपाको पूर्वनिर्धातिर महाधिवशनसम्बन्धी छलफलका लागि विस्तारित बैठकमा प्रस्ताव गर्ने निर्णय गरेको छ । 

रास्वपाले बैठकपछि जारी गरेको विज्ञप्तीमा भनिएको छ,ुपार्टीको पहिलो ऐतिहासिक महाधिवेशन २०८२ फागुन ७, ८ र ९ गते आयोजना गर्ने पूर्वनिर्धारित कार्यक्रम रहेकोमा, वर्तमान सरकारले २०८२ फागुन २१ गते आम निर्वाचन घोषणा गरेको परिवर्तित परिस्थितिलाई ध्यानमा राखी, महाधिवेशनसम्बन्धी आवश्यक छलफल र निर्णय आगामी विस्तारित बैठकमा प्रस्ताव गर्ने । त्यसका लागि असोज ७ गते केन्द्रीय कार्यालय बनस्थलीमा केन्द्रीय समिति बैठक बोलाएको छ ।