दुई वर्ष अघि खिचिएको विपिन जोशीको भिडियो, अहिलेको अवस्था अज्ञात

काठमाडौँ । दुई वर्षदेखि गाजामा हमासले बन्धक बनाएका नेपाली विद्यार्थी विपिन जोशी बोलिरहेको   भिडियो क्लिप्स सार्वजनिक भएको छ । 

द टाइम्स अफ इजरायलले बुधबार राति २०२३ अक्टोबर ७ का दिन किबुट्ज अलुमिममा भएको आक्रमणका क्रममा हमासले विपिन अपहरण गरेको केही समयपछि खिचेको भिडियो भन्दै सार्वजनिक गरेको हो। 

इजरायलको रक्षा बलले बरामद गरी विपिनको परिवारलाई उपलब्ध गराएको भिडिओ २०२३ नोभेम्बरमा(दुई वर्षअघि)खिचिएको भनिएको ३३ सेकेन्डको भिडियोमा जोशी अंग्रेजीमा आफ्नो परिचय दिएका छन् ।

उनले भनेका छन्,‘मेरो नाम बिपिन जोशी हो। म नेपालबाट हुँ। म २३ वर्षको भएँ। म २५ दिनअघि इजरायल आएको थिएँ। म यहाँ सिक्नुहोस् र कमाउनुहोस् कार्यक्रमका लागि आएको थिएँ, म एक विद्यार्थी हुँ’, उनी भनिरहेका छन्, ‘म सिट्रस र कागती फार्ममा कृषि फार्ममा काम गर्छु।’

यो भिडियोसँगै उनी जीवित रहेको आशा पलाएको छ। तर त्यो भिडिओ २ वर्षअघिकै भएकाले विपिनको वर्तमान अवस्था अझै स्पष्ट छैन। 

२०८० भदौ २६ गते सुदूरपश्चिम विश्वविद्यालयबाट बीएसस्सी एग्रिकल्चर अध्ययन गरेर इजरायलमा ‘लर्न एन्ड अर्न’ अन्तर्गत ११ महिनाका लागि इन्टर्न गर्न गएका जोशी अहिले सम्म सम्पर्कविहीन भएका थिए । 

इजरायल गएको एक महिनामै असोज २० मा प्यालेस्टाइनी विद्रोही हमास समूहको आक्रमणमा जोशीसँगै रहेका १० नेपालीको मृत्यु भएको थियो । सोहि दिनबाट हमासले अपहरण गरेका जोशीको अवस्था अहिलेसम्म अज्ञात रहेको छ ।