विश्वविद्यालयको कुलपति प्रधानमन्त्री हुने व्यवस्थालाई हटाउनुपर्छः शिक्षामन्त्री पुन

काठमाडौँ । शिक्षा, विज्ञान तथा प्रविधिमन्त्री महावीर पुनले विश्वविद्यालयको कुलपति प्रधानमन्त्री हुने व्यवस्थालाई हटाउनुपर्ने बताएका छन् । 

सोमबार केशरमहलस्थीत मन्त्रालयमा पत्रकार सम्मेलन गर्दै मन्त्री पुनले अहिले विश्वविद्यालयहरुमा राजनीति भइरहेको गुनासो आउने गरेको भन्दै विश्वविद्यालयमा राजनीति अन्त्य गर्न कुलपति प्रधानमन्त्री हुने व्यवस्था हटाउनुपर्ने बताएका हुन् । त्यसका लागि कानून संशोधन गर्न हाल असम्भव रहेपनि विश्वविद्यालय सुधारको कार्यक्रमलाई अघि बढाउने तयारी भएको उहाले जानकारी दिए । 

मन्त्री पुनले विश्वविद्यालयको कुलपतिमा प्रधानमन्त्री नभइ बोर्ड अफ ट्रस्टी गठन गरेर सोही बोर्डले निष्पक्ष रूपमा कुलपति चयन गर्ने व्यवस्था गर्नुपर्नेमा जोड दिए । 

त्यस्तै मन्त्री पुनले जेनजी आन्दोलनका क्रममा सिटिइभिटी अन्तर्गत भएका परिक्षाको केहि उत्तरपुस्तीका जलेकाले पुन परिक्षा लिने निर्णय भएको जानकारी दिए । पुनः परिक्षा गर्न १ करोड ७५ लाख खर्च लाग्ने भएकाले त्यसको व्यवस्था भइसकेको उनले बताए । त्यस्तै २०६९ सालदेखि सिटिइभिटी अन्तर्गत सम्बन्धन दिने काम रोखिएको अवस्थामा अव दुई महिनाभित्र छानविन गरेर सम्बन्धनको टुङ्गो लगाइने उनले जानकारी दिए । 

मन्त्री पुनले विद्यालय शिक्षकहरुको सरुवाका बिषयमा धेरै गुनासो आएकाले सरुवा सम्बन्धी कार्यविधिलाई संशोधन गर्ने तयारी भएको बताए ।