चोरी तथा लुटपाटमा संलग्न पाँच जना पक्राउ, सात तोला सुनसहित पाँचलाख बढी नगद बरामद

काठमाडौँ । उपत्यकाका विभिन्न स्थानहरुबाट सुनको सिक्री चोरी तथा लुटपाट कार्यमा संलग्न पाँच जनालाई प्रहरीले पक्राउ गरेको छ । प्रहरी वृत स्वयम्भूबाट खटिएको प्रहरी टोलीले उनीहरुलाई पक्राउ गरेर बुधबार सार्वजनिक गरेको हो ।

पक्राउ परेकाहरुलाई जिल्ला अदालत काठमाडौँमा मुद्दा दर्ता गरिएको र थप अनुसन्धान कार्य अगाडी बढाइएको प्रहरीले जनाएको छ । पक्राउ पर्नेहरुमा सिन्धुली हरिहरगढी गाउँपालिका ६ घरभइ हाल भक्तपुर, सूर्यविनायक नगरपालिका ५ बस्दै आएका २८ वर्षका राज लामा र उदयपुरको ताप्लेगाउँपालिका ४ घरभइ भक्तपुरमा बस्दै आएका बिशाल भन्ने दुर्ग बहादुर मगर रहेका छन् ।

उनीहरु दुइ जनाले विभिन्न समयमा काठमाडौँ लगायत आसपासका क्षेत्रमा मोटरसाइकलमा जाने र सुनका सिक्री लुटेर ल्याउने गरेको प्रहरीले जनाएको छ । त्यस्तै, अन्य तीन जना भने चोरी तथा लुटपाट गरेर ल्याएको सुन खरिद बिक्रीमा संलग्न रहेको प्रहरी अनुसन्धानबाट खुल्नमा आएको छ ।

रामेछापको लिखु तामाकोसी गाउँपालिका ६ घरभई भक्तपुर बस्दै आएका ३२ वर्षका दिल बहादुर बि.क,  बागलुङको गल्कोट नगरपालिका २ घरभई हाल काठमाडौको बूढानीकण्ठ नगरपालिका ६ मा बस्दै आएका गोविन्द सुनार र कैलालीको लम्की चुहा नगरपालिका ७ घरभई हाल काठमाडौँ २२ मा बस्दै आएका २२ वर्षका दिपेश रसाईली भने उनीहरु दुइ जनाले लुटपाट तथा चोरी गरेर ल्याएको सुन खरिद बिक्री गर्ने कार्यमा संलग्न रहेको प्रहरीले जनाएको छ ।

त्यस्तै, पक्राउ परेको उनीहरु पाँच जनाको साथबाट पाँच लाख ५४ हजार ५ सय नगद, सात तोला ४८ लाल सुन, आइफोन सामसुङ लगाएत विभिन्न ब्राण्डका दशथान मोवाइलसेट र चोरीमा प्रयोग भएका दुइ थान मोटरसाइकल समेत बरामद गरिएको प्रहरीले जनाएको छ ।

गएको एक महिना देखि काठमाडौँ र आसपासका विभिन्न क्षेत्रमा चोरी लुटपाट भैइरहेको उजुरी तथा सुचनाको आधारमा उनीहरुलाई पक्राउ गरिएको प्रहरीले जनाएको छ । अदालतबाट पाँचै जनालाई आठदिनको थुनछेक म्यादलिइ उनीहरुमाथि थप अनुसन्धान भैइरहेको प्रहरीले जनाएको छ ।