रास्वपाकाे राजनीतिक प्रतिवेदनमा वैकल्पिक शक्ति एक हुन यस्तो प्रस्ताव

चितवन । राष्ट्रिय स्वतन्त्र पार्टीका कार्यावाहक सभापति डोलप्रसाद अर्यालले जनअनुमोदनका दृष्टिले सबैभन्दा दल हुनुको नाताले परिवर्तनकारी दल, संगठन, समूह वा व्यक्तिलाई एकीकृत गर्ने जिम्मेवारी रास्वपाको भएको बताएका छन् । उनले सबैलाई स्वागत गर्न आफूहरु तयार रहेको बताएका हुन् । 

चितवनमा आयोजित बिस्तारित बैठकमा राजनीतिक प्रतिवेदन प्रस्तुत गर्दै कार्यबाहक सभापति अर्यालले पार्टी स्थापनाकै समयमा अहिले नाम चर्चामा आएका व्यक्तिहरु छलफल गरेको त उनीहरु नपत्याएको बताएका छन् । ‘पार्टी स्थापना गर्दा अहिले नाम आएका सबैसँग सँगै जाऊँ भनेर कुरा गर्दाको साक्षी मै हुँ । तर, त्यसबेला उहाँहरूले पत्याउनु भएन । अहिले पनि हामी उहाँहरूलाई हार्दिकतापूर्वक स्वागत गर्न चाहन्छौ ।’ 

अर्यालले पार्टी कब्जा गर्ने नियतको भने खुला प्रतिवाद गर्ने बताएका छन् । ‘यो पार्टीको इतिहास र पहिचान उहाँहरूले पनि बुझ्नु पर्छ । पार्टी बनाउने चाहानालाई स्वागत छ । तर, ‘कब्जा’ गर्ने नियतको चाहिँ खुला प्रतिवाद गछौँ नै ।’ 
उनले तत्कालीन सरकारले राजनीतिक स्वार्थ प्रेरित भएर तथ्यहीन अभियोग लगाएका कारण पनि सिंगो पार्टीपंक्ति सभापति रवि लामिछानेविरुद्धको षड्यन्त्रमा उभिएको बताएका छन् ।  ‘राज्यले नै षड्यन्त्रमूलक रुपमा नेतृत्वको बद्नामीसँगै पार्टीलाई कमजोर बनाउन खोज्छ भने त्यसविरुद्ध संस्थागत प्रतिवाद गर्नु हाम्रो कर्तव्य हो ।’ अर्यालले भने, ‘हामी न मुद्दामा चुकेका छौं, न कर्तव्यमा । सभापति र उहाँका मुद्दालाई जोडेर पार्टीप्रति गरिँदै आएको कुप्रचार हामीमाथिको समग्र षड्यन्त्रकै अशं हो भन्नेमा हामी सचेत छौं ।’ 

पार्टीको बिस्तारित बैठक शनिबारसम्म चल्नेछ ।