पत्रकार धरपकडको घटनामा छानबिन गरी दोषिलाई कारवाही गर्न सरकारलाई रास्वपाको निर्देशन

काठमाडौँ । राष्ट्रिय स्वतन्त्र पार्टी (रास्वपा)ले पत्रकारहरुमाथि भएको धरपकडको घटनाको छानबिन गरी दोषिलाई कारवाही गर्न सरकारलाई निर्देशन दिएको छ । 

Watch On

पार्टी कार्यालय बनस्थलीमा शनिबार बसेको रास्वपा सचिवालय बैठकले पत्रकारहरुमाथि भएको धरपकड गलत भएको निष्कर्ष निकाल्दै कुनै ढिलासुस्ती नगरि धरपकडको घटनाको छानबिन गर्दै दोषिलाई कारवाही गर्न सरकारलाई निर्देशन दिएको रास्वपा प्रवक्ता जगदिश खरेलले जानकारी दिए । 

बैठकले पार्टीको नेतृत्वमा सरकार रहेकोले सरकारले विधि, न्याय, मानव अधिकार र सामाजिक लोकतन्त्रको सम्मान गर्नुपर्ने प्रष्ट पारेको उहाले बताउनुभयो । आगामी दिनमा प्रेस स्वतन्त्रताका घटना, पत्रकार धरपकडका घटना अथवा समाचार लेखेकै भरमा कसैलाई पक्राउ नगर्न समेत सरकारलाई निर्देशन दिएको प्रवक्ता खरेलले बताए । 

त्यस्तै बैठकले न्यायलयका क्षेत्रमा आएका विषयहरुमाथि छलफल गर्दै न्यायपालिकाको पुनःसंरचना र न्याय निरुपणका सन्दर्भमा संसद्मार्फत नै निकास निकाल्ने निर्णय भएको प्रवक्ता खरेलले जानकारी दिए । यसका लागि संसदमार्फत नै आवश्यक प्रक्रिया अघि बढाउन संसदीय दललाई सोहि अनुसार नै निर्देशन दिएको उनले बताए । 

उनले शक्ति पृथकीकरणको सिद्धान्त अनुसार अदालत र सरकारबाट मात्र नभई संवैधानिक बाटो संसद भएकाले संसदबाटै न्याय निरूपण र पुनर्संरचनाको विषय उठाइने जनाए । विवादमा मुछिएका न्यायधीशलाई महाअभियोग लगाउने तयारीका बारे सञ्चारकर्मीको प्रश्नमा प्रवक्ता खरेलले संसदीय दलमार्फत संसदमा प्रवेश गरेपछि मात्रै त्यसको टुंगो लाग्ने जवाफ दिए ।