विवादित न्यायाधीशलाई महाअभियोग लगाउने रास्वपाको तयारी, सदंदीय दललाई प्रक्रिया अघि बढाउन निर्देशन

काठमाडौँ। राष्ट्रिय स्वतन्त्र पार्टी (रास्वपा) ले विवादित न्यायाधीशहरुका विषयमा महाअभियोगको तयारी गर्न संसदीय दललाई निर्देशन दिएको छ । 

Watch On

शनिबार दिउँसो पार्टी केन्द्रीय कार्यालयमा बसेको सचिवालय बैठकले बाहिर आएका विषयबारे संसद्मार्फत प्रक्रिया अघि बढाउनुपर्ने निष्कर्ष निकालेको प्रवक्ता जगदीश खरेलले जानकारी दिए ।
उनका अनुसार, संसदीय समितिलाई प्रक्रिया अघि बढाउन पनि निर्देशन दिइएको छ ।

‘यदि हामीले समग्र न्याय क्षेत्रकै पुनर्संरचना गर्ने हो भने अब यसका लागि संवैधानिक बाटो भनेको संसद् नै हो । संसद्मार्फत यसको प्रक्रिया अघि बढाइनुपर्छ,’ खरेलले भने, ‘त्यो प्रक्रिया अघि बढाउनका लागि रास्वपाको आजको सचिवालय बैठकले संसदीय दललाई समेत निर्देशन दिइसकेको छ ।’

महाभियोग जान्छ, छानबिन मात्रै हुन्छ वा के हुन्छ भन्ने विषय संसदीय समितिकै रहेको उनको भनाइ छ ।

‘यो क्षेत्र (न्यायालय) को पनि पुनर्संरचना हुनुपर्छ भन्ने महसुस पार्टीले गरेको छ,’ खरेलले भने । औपचारिकरुपमा प्रवक्ता खरेलले न्याय क्षेत्रमाथि उठेका विषहरूको निरुपण गर्ने प्रक्रिया अघि बढाउनका लागि संसदीय दललाई निर्देशन दिइने बताए । 

अर्का एक सचिवालय सदस्यले अहिले नै महाभियोग शब्दनै प्रयोग नगरेपनि पार्टीको बैठक अनुसार यो प्रक्रिया महाअभियोगकै लागि हो । 

उनले भने, पार्टीले संसदिय दललाई प्रक्रिया अघि बढाउन निर्दशन दिनु भनेको महाअभियोगको तयारीका लागि भनिएको हो ।