रास्वपा कार्यबाहक सभापति डिपी अर्यालको राजनीतिक प्रतिवेदन (पूर्ण पाठ)

चितवन । राष्ट्रिय स्वतन्त्र पार्टीको बिस्तारित बैठक चितवनमा जारी छ । बैठकमा पार्टीका कार्यवाहक सभापति डोलप्रसाद (डिपी) अर्यालले राजनीतिक प्रतिवेदन पेश गरेका छन् । उनले जेनजी आन्दोलनको कारक, आफूहरुको मुद्दा, वर्तमान सरकार, पार्टी रिफर्मेसन, महाधिवेशन, आगामी चुनाव लगायत विषयमा केन्द्रित भएर प्रतिवेदन पेस गरेका हुन् । 

Watch On

कार्यबाहक सभापति अर्यालले जेन–जी आन्दोलन र बर्तमान परिस्थितिको कारक पुराना दलका हर्कत र जनविरोधी गतिविधि भएको बताएका छन् । त्यस्तै आफ्नो पार्टी र सभापति रवि  लामिछानेले यस्तो अवस्था आउनसक्ने संकेत गर्दै पटक–पटक सचेत गराउने प्रयास गरेको समेत उल्लेख गरेका छन् । 

‘संसदीय अंकगणितको बलमा शासकीय अहंकार, दम्भ र अर्कमण्यता बढ्दै गयो भने नागरिकमा चुँलिदै गएको आक्रोश विस्फोट हुनेछ । सभापति रवि लामिछानेज्यूले कांग्रेस–एमालेको सहकार्यमा सरकार बने लगत्तै त्यसलाई ‘अन्तिम भोज’को संज्ञा दिँदै यस्तो समीकरण पनि असफल हुँदाको नतिजा कल्पना गर्नुभएको छ ? भनेर प्रश्न गर्नुभएको थियो ।’ अर्यालले प्रतिवेदनमा भनेका छन् । 

त्यस्तै अर्यालले राजनीतिक प्रतिवेदनमार्फत २३ गतेको हत्याको कारण २४ गतेको परिस्थिति बनेको र दोषीउपर कारवाही हुनुपर्ने माग राखेका छन् । उनले भनेका छन्, ‘२३ गते राज्य शक्तिको दुरुपयोगमा जनहत्या भएकै कारण २४ गतेका घटना भएका हुन् । तर, दुबै दिनका घटनाको निष्पक्ष छानबिन गरी अपराध र संलग्नताको आधारमा दोषीलाई कारबाही गर्नुपर्छ ।’ 

प्रतिवेदनमा संबैधानिक प्रबन्ध बाहिरबाट न्यूनतम स्वीकार्यतासहित ६ महिनाभित्र प्रतिनिधिसभाको चुनाव गराउने सीमित कार्यादेश दिएर बनाइएको सरकार परिस्थितिको बाध्यात्मक उपज तर आन्दोलनको म्यान्डेट भएको र घोषित मितिमा अन्तरिम सरकारले गर्ने निर्वाचन नै ‘डिरेल’ भएको संविधानलाई लिकमा ल्याउने वैध, सरल र सहज बाटो भएको उल्लेख छ । केही नेता विशेषसँग प्रधानमन्त्री स्वयमको संवाद अनिच्छाले ति दल र सरकारबीचको दूरी बढाउने हो कि भन्ने स्वभाविक चिन्ता रहेको र सरकार सबै दल, नेता र जनताको अभिभावक भएकाले उसमा कसैप्रति पनि आग्रह–पूर्वाग्रह पटक्कै हुन नहुने बताइएको छ ।  

पार्टीले चुनावी नारा ‘सोचदेखि शासनसम्म’ राख्ने बताएको छ । जनताको मानसिकता, कर्मचारीतन्त्रको कार्यशैली, राजनीतिक नेतृत्वको दृष्टिकोण र समग्र शासन प्रणालीमै व्यापक सुधार चाहेको बताइएको छ । पार्टी रिफर्मको विषयमा भने पुराना पार्टीहरु जस्तो पूरै भत्काएर नयाँ ‘रिफर्म’ गर्नुपर्ने अवस्थामा आफूहरु नरहेको बताइएको छ । 

त्यस्तै अप्रत्याशीत राजनीतिक परिस्थितिका कारण फागुनमा प्रतिनिधिसभा सदस्यको निर्वाचन गर्नुपर्ने बाध्यताका कारण तोकिएको समयमा महाधिवेशन गर्न असंभवप्राय देखिएको अर्यालले बताएका छन् । 

कार्यबाहक सभापति डोल प्रसाद अर्यालद्वारा प्रस्तुत राजनीतिक प्रतिवेदनको पूर्ण पाठ