१० दिनसम्म बसपार्कको रोडमा महिलाको शव, ५०० रुपैयाँका कारण भएको थियो हत्या

काठमाडौँ । शनिबार बिहान काठमाडौँ महानगरका सफाइकर्मी फोहोर उठाउन काठमाडौँको बसपार्क पुगे । फोहोर उठाउने क्रममा उनीहरुले एउटा बोरामा फोहोरको पोको देखे । जब उनीहरुले त्यो फोहोरलाई गाडीमा हाल्ने लागे त्यो फोहोरबाट फरक गन्ध आयो । सफाइ कर्मचारीका लागि फोहोर गन्हाउनु नौलो कुरा थिएन । तर उक्त बोराबाट कुहएिको सिनु जस्तो गन्ध आइरहेको उनीहरुले चाल पाए । 

बोरामा प्याक गरिएका कारण त्यहाँ मरेको कुकुर हुनसक्ने उनीहरुले अनुमान लगाए । केहीबेरमै उक्त बोरामा मान्छेको शव पनि हुनसक्ने अनुमान सुरु भयो । सफाई कर्मचारीहरुले उक्त फोहोर नउठाइ त्यहाबाट निस्के र केही बेरमा प्रहरी त्यहाँ आइपुग्यो । 

जब प्रहरीको टोलीले त्यो बोरा खोले, सबैजना चकित भए । त्यो बोरामा कुनै कुकुर वा जनावर नभएर मान्छेको शव रहेछ । 

उक्त बोरामा एक महिलाको शव थियो । तर, को कहाँको भन्ने खुलेन । केही प्रत्यक्षदर्शीहरुले त्यो बोरा १०/१५ दिनदेखि सोही स्थानमा रहेको बताए । केहीले अघिल्लो राति ल्याएको हुनसक्ने बताए । 

घटनास्थलको मुचुल्का तयार पारी प्रहरीले अनुसन्धान अघि बढायो । प्रहरीले शव निकाल्दा बाहिरी आवरणमा बोरा, त्यसको भित्र कालो प्लास्टिक र त्यो भन्दा भित्र तन्नामा बेरेर शव शव फालिएको थियो । 

प्रहरीले त्यही तन्नाको फेरो समातेर अनुसन्धान अघि बढायो । किनकी त्यो शवमा बेरिएको तन्नामा एउटा होटलको नाम लेखिएको थियो । उक्त होटल थियो टोखा नगरपालिका वडा नम्बर ९ मा रहेको होटल रोयल कुन्डला । 

अनुसन्धानको क्रममा मृतक युवतिको नाम माया भनेर चिनिने आयुषा मगर भएको खुलेको छ । उनी रुकुमको बताइएको छ । उनी करिब १५ दिनअघि आफ्नो साथी डोल्मासँग रातको करिब १२ बजे आसपासको समयमा सो होटलमा पुगेकी थिइन् । सो क्रममा मायाकी साथी डोल्मा होटलको टप फ्लोरमा रहेको कोठामा सुत्न गइन् । 

त्यो होटलमा २४ वर्षका सूर्य थापामगर कुकका रुपमा कार्यरत छन् । माया भने स्टाफ रुममा बसेर कुक सूर्य थापामगरसँग कुरा गर्न थालिन् । त्यहाँबाट माया सूर्यसँग ५ सय रुपैयाँ मागेर लागुऔषध ब्राउन सुगर किन्न गएको खुलेको प्रहरीले बताएको छ । 

प्रहरी अनुसन्धानका क्रममा माया लागु औषध सेवनकर्ता भएको र कुक सूर्य लागुपदार्थ सेवनकर्ता भएको खुलेको छ । माया फर्केर आएपछि सूर्यले रक्सी खानको लागि मायालाई आफूले दिएको रकम फिर्ता माग्न थाले । सो क्रममा उनीहरुको झगडा पर्यो । आफूलाई पैसा फिर्ता नदिएको झोकमा सूर्यले जुत्ताको तनाले घाँटीमा कसेर मायाको हत्या गरेको काठमाडौँ प्रहरी परिसरका प्रवक्ता एसपी पवनकुमार भट्टराईले जानकारी दिए । 

प्रहरीका अनुसार सूर्यले सोही स्टाफ रुममा रहेको तन्ना र सिरानीको खोलमा मायाको शव बेर्छन र फोहोर र्याप गर्ने कालो प्लाष्टिकमा राखेर फेरि बाहिरबाट बोरामा प्याक गरेर बाहिर लगेर फ्याकिँदिएको बयान दिएका छन् । 
सूर्य थापामगर अहिले प्रहरीको नियन्त्रणमा छन् । उनले आफूले मायाको हत्या गरेको स्वीकार गरेको पनि प्रहरीले बताएको छ । 

प्रहरी अनुसन्धानको क्रममा मायाको मृत्यु काक्तिक २६ गते भएको देखिएको छ । १० दिनदेखि एउटा मान्छेको शव काठमाडौँको सबैभन्दा व्यस्त मध्येको स्थानमा बोरामा प्याक भएर बसेको थियो । तर कसैले पत्तो पाएन । 
प्रहरीले यस विषयमा थप अनुसन्धान भइरहेको बताएको छ ।