मूल्य मनपरी गरेको देखिएपछि अर्घाखाँची सिमेन्टलाई २ लाख ५ हजार जरिवाना

काठमाडौँ । वाणिज्य, आपूर्ति तथा उपभोक्ता हित संरक्षण विभागले अर्घाखाँची सिमेन्टलाई कारबाही गरेको छ। रूपन्देहीमा रहेको उक्त सिमेन्ट उद्योगले उपभोक्ताबाट मनपरी मूल्य लिन छेडखानी गरेको अनुगमनका क्रममा पाइएपछि जरिवाना गरिएको हो । 

विभागका सूचना अधिकारी भरत प्रसाद आचार्य अर्घाखाँची सिमेन्टलाई फ्याक्ट्री गेट मूल्य निर्धारण नगरेका कारण २ लाख ५ हजार रुपैयाँ जरिवाना गरिएको सिधाकुरालाई बताए ।

‘उद्योगहरूले आआफ्नो लागत र गुणस्तरका आधारमा मूल्य निर्धारण गर्ने हो । तर, अर्घाखाँचीले विभागसँग गरेको समझदारीअनुसार फ्याक्ट्री गेट मूल्य निर्धारण गरेको देखिएन,’ विभागका उपसचिव एवम् सूचना अधिकारी आचार्यले भने,‘ त्यसकारण कानुन बमोजिम २ लाख ५ हजार रुपैयाँ जरिवाना गरिएको हो ।’

विभागका अनुसार हरेक सिमेन्ट उद्योग आफ्नो मूल्य तोक्न स्वतन्त्र छन् । किनकी सरकारले बजारको मूल्य निर्धारण गर्ने कानुन नबनाएका कारण अहिलेलाई कुनै व्यवधान छैन् । तर, बजारमा पठाउने वस्तुको फ्याक्ट्रीले तोकेको मूल्य राख्दिन भन्न भने उद्योगले पाउँदैनन् । 

एक्स फ्याक्ट्री मूल्यका आधारमा बजार मूल्य, कर तथा ढुवानीको लागत हिसाब हुनेभएकाले पनि यो अत्यन्तै महत्वपूर्ण भएको विभागको दाबी छ । यसरी मूल्य नतोक्नुलाई मूल्यमा छेडखानीका रुपमा बुझ्नुपर्ने पनि विभागले जनाएको छ ।  

यस अघि विभागमै भएको समझदारी अनुसार फ्याक्ट्री मूल्य तोक्ने सहमति पनि अर्घाखाँचीले उल्लङ्घन गरेको विभागको दाबी छ । रूपन्देहीमा रहेको अर्घाखाँची सिमेन्ट नेपालको ठूलो र पुरानोमध्येको एक हो । नेपाल उद्योग वाणिज्य महासङ्घका पूर्वअध्यक्ष पशुपति मुरारका यो उद्योगका सञ्चालक हुन ।