सभापति देउवाले नाममात्रैको कार्यवाहक दिएको गगनको आरोप

काठमाडौँ । नेपाली कांग्रेसका महामन्त्री गगन कुमार थापाले पार्टी सभापति शेरबहादुर देउवाले नाममात्रैको कार्यवाहक दिएको आरोप लगाएका छन् । उनले पार्टी बैठकमा नआएपनि सभापति देउवाले निवासबाटै पार्टी सञ्चालन गरेको टिप्पणी गरे । पार्टीको सर्वोत्तम हितका बारेमा सबैभन्दा बढी सभापतिले चिन्ता गर्नुपर्ने उनको भनाइ छ । 

Watch On

त्यस्तै उनले तोकिएको समयमा नै पार्टीको महाधिवेशनको सुनश्चितताका लागि वडा र क्षेत्र हुँदै केन्द्रीय महाधिवेशन गर्न प्रस्ताव गरेका छन् । 

बुधबार पार्टी कार्यालय सानेपामा बसेको कांग्रेस केन्द्रीय कार्यसमिति बैठकमा थापाले कार्यतालिका अनुसार महाधिवेशन गर्न समयको दवाव रहेकाले वडा र क्षेत्र हुँदै केन्द्रीय महाधिवेशन गर्न प्रस्ताव गरेका हुन् ।  अन्य अधिवेशन महाधिवेशनपछि गर्न सकिने उनकोे प्रस्ताव छ । 

थापाले क्रियाशिल सदस्यताको विवाद समाधान गर्न सर्वाधिकार सम्पन्न प्रतिनिधि फिल्डमा उठाउनुपर्ने समेत बताएका छन् । बैठकपछि महामन्त्री थापाले पुष १६ गते गर्ने भनिएको वडा अधिवेशन पुस २१ गते, २३ गते क्षेत्रको अधिवेशन र २६ गते केन्द्रीय महाधिवेशन गर्न सकिने आफ्नो प्रस्ताव रहेको जानकारी दिए । प्रस्तावित कार्यतालिकामा सहमत नभए महाधिवेशनमा नै असर पर्ने उनको भनाइ छ । उनले आफूले प्रस्ताव गरेको विकल्प प्रस्ताव अमान्य भए विशेष महाधिवेशन कसैले रोक्न नसक्ने स्पष्ट पारे । 

बैठकमा महामन्त्री गगनकुमार थापा, सहमहामन्त्रीहरु— महेन्द्र यादव र बद्री पाण्डे सदस्यहरु– बिजयकुमार गच्छदार, कृष्णप्रसाद सिटौला, डा.शेखर कोइराला, ज्ञानेन्द्र बहादुर कार्की, उमा रेग्मी, सुजाता कोइराला, एन.पी.साउँद र आनन्द प्रसाद ढुङ्गानाले धारणा राख्नुभएको थियो । बैठक बिहीबार दिउँसा १ बजे पुनः बस्ने कांग्रेसले जनाएको छ ।