रास्वपाको समानुपातिक उम्मेदवार निर्वाचनमा युवा नेता मिलन लिम्बु

काठमाडौँ । राष्ट्रिय स्वतन्त्र पार्टी (रास्वपा) ले प्रतिनिधिसभा समानुपातिकतर्फका उम्मेदवार छनोटका लागि सुरु गरेको प्रारम्भिक निर्वाचन (प्राइमरी इलेक्सन)मा पूर्वपत्रकार तथा रास्वपाका युवा नेता मिलन लिम्बू सहभागी भएका छन् ।

लिम्बूले पार्टीका सदस्य र समर्थकहरूलाई सम्बोधन गर्दै प्राइमरी निर्वाचन केवल व्यक्ति चयनको प्रक्रिया नभई पार्टीको भविष्य, विचार र यात्रालाई अघि बढाउने सहयात्री छनोट गर्ने महत्वपूर्ण अभ्यास भएको बताएका छन् । उनले पत्रकारितादेखि सार्वजनिक जीवनसम्म सत्य बोल्ने, जनताको पक्षमा उभिने र सत्ता भन्दा जिम्मेवारी खोज्ने अभ्यास गर्दै आएको उल्लेख गरेका छन् ।

“आज म यही अनुभव, इमानदारी र प्रतिबद्धता बोकेर पार्टीभित्र तपाईंहरूको विश्वास माग्दैछु,” लिम्बूले सन्देशमा भनेका छन् ।

इलामको उपनिर्वाचनमा पार्टी र समर्थकबाट पाएको माया स्मरण गर्दै उनले उक्त निर्वाचनमा मिलन लिम्बूलाई संसद पुर्‍याउने साझा चाहना अधुरो रहे पनि त्यसलाई पूरा गर्ने अर्को अवसर आएको बताएका छन् ।

लिम्बूले संसदमा रास्वपाको आवाज स्पष्ट र जिम्मेवार हुनुपर्ने, सबै जाति, वर्ग, लिङ्ग, क्षेत्र तथा आम पार्टी सदस्य र शुभेच्छुकहरूको भावना सही रूपमा प्रतिनिधित्व हुनुपर्ने र पार्टीभित्र योगदान तथा विचारको कदर हुनुपर्ने आफ्नो चाहना स्पष्ट पारेका छन् ।

समानुपातिक उम्मेदवार छनोटका लागि भइरहेको प्राइमरी निर्वाचनमा आफूलाई मत दिन आग्रह गर्दै उनले एक मतले व्यक्तिभन्दा पनि पार्टीभित्र लोकतान्त्रिक अभ्यास, पारदर्शिता र विश्वासको संस्कारलाई बलियो बनाउने विश्वास व्यक्त गरेका छन् ।

“पार्टीभित्रबाटै राम्रो प्रतिनिधि छान्ने अभ्यासलाई सफल बनाऔं,” भन्दै लिम्बूले विश्वास र समर्थनको अपेक्षा गरेका छन् ।

रास्वपाले समानुपातिक उम्मेदवार छनोटमा प्राइमरी निर्वाचनमार्फत आन्तरिक लोकतान्त्रिक अभ्यासलाई संस्थागत गर्ने प्रयास गरिरहेको छ ।