समानुपातिक सूची बारे रवि लामिछानेः 'समय अभावमा कमजोरी भयो होला, सच्याउँछौँ! विधि नाघेर जानेहरु रिकल हुन्छन्'(भिडियो)

पोखरा । राष्ट्रिय स्वतन्त्र पार्टी(रास्वपा)का सभापति रवि लामिछानेले पार्टीको समानुपातिक सूची भएका कमजोरी सच्याइने बताएका छन् । पोखरामा सञ्चारकर्मीहरुसँग कुरा गर्दै लामिछानेले सबै एक ठाउँमा उभिएर जाने प्रक्रियामा लाग्दा सूची निमार्णमा समय नपुगेको स्विकार गर्दै उनले समानुपातिक सूचि रिभ्यु हुने बताएका हुन् । 

Watch On

‘पछिल्लो परिस्थितिमा जुन राजनीतिक घटनाक्रमहरू भए, विशेषगरेर हामी नयाँ जसरी एक ठाउँमा उभिएर जाने भनेर छोटो समयमा निर्णय भयो । त्यसले हामीलाई तयारीमा हाम्रो समय नपुगेको जरुर हो,’ लामिछानेले भने, ‘अहिले सार्वजनिक चासोमा आउनुभन्दा अघि नै यो चाहीँ रिभ्यू गर्ने समय हुन्छ भन्नेलाई मध्यनजर गर्दै, किनभने कुलमानजीसँग हामीले अन्तिम समयमा गरेका हौं । किनभने उता सूची बुझाउनु छ, यता हामी सहमति गर्दै थियौं ।’

सभापति लामिछानेले विधिभन्दा बाहिर रास्वपा कुनै हालतमा नजाने दाबी गरे । उनले भने ‘रास्वपासँग विधिसँग छ, विधिभन्दा बाहिर हामी कुनै हालतमा जाँदैनौं । परिवारवादमा रास्वपा स्पष्ट छ । विधानले नै दिँदैन,कथमकदाचित यी सबै विधिहरू नाघेर जानु भएछ भने राइट टू रिकलको व्यवस्था रास्वपाको विधानले नै गरेको छ ।’

‘हामी सचेत छौं । तर समयले गर्दा अरु दुई दिन पनि अरु केही विवाद छन् कि भनेर हामी वेट गरेका छौं । यो दुई दिनमा जति पनि जायज गुनासो छन्, सबै सम्बोधन गर्छौँ । किनभने हामीले बोक्नुपर्ने एक जना मान्छे पनि छैन पार्टीमा,’ लामिछानेले भने ।

समानुपातिक सूचीका बारेमा चासो राखेर खबरदारी गर्नेहरुलाई लामिछानेले सच्याउन सझुाव दिएकोमा धन्यवाद बनेका छन् । उनले भने ,लोकतन्त्रका यो एउटा सुन्दर पक्ष हो, गुनासो आएपछि हामीले त्यसलाई समाधान गर्न सहजिकरण हुन्छ, हामीबाट सुरु भएको छ, खबरदारीका लागि धन्यवाद । कुनै समस्या आउन दिदैनौँ ।