भ्रम छर्न पूरानो कागज प्रकाशन गर्ने कान्तिपुरले अरुलाई कानुन सिकाउनुपूर्व आफूले सिकोस् : रवि लामिछाने

राष्ट्रिय स्वतन्त्र पार्टीका सभापति रवि लामिछानेले सहकारीले हिनामिना गरेको विषयमा आफ्नो नाम विभिन्न मिडियाले जोडेकोप्रति सामाजिक संजालबाट जवाफ दिएका हुन । 

Watch On

सामाजिक संजाल फेसबुकमा स्टाटस राख्दै उनले कान्तिपुर दैनिकमा मंगलबार प्रकाशित समाचारमा ग्यालेक्सी टीभीको सेयरसँग सम्बन्धित पुरानो कागजात प्रकाशित गरेको भन्दै खेद प्रकट गरेका छन् ।

उनले पूरानो कागजात प्रकाशन गरि आफू अझै गोर्खा मिडिया नेटवर्कको सेयरवाला रहेको भ्रम छर्न खोजिएको बताएका छन् । 

‘कान्तिपुर दैनिकले हिजो (मंगलबार) ‘सहारा चितवन सहकारीका बचतकर्ता वेसहाराः ८५ करोड हिनामिना, बिनाधितो १२ करोड ग्यालेक्सीमा शीर्षक’को समाचार प्रेषित गर्‍यो। समाचारमा म अझै ग्यालेक्सी टिभी सञ्चालन गर्ने गोर्खा मिडिया नेटवर्कको सेयरवाला रहेको भ्रम छर्न खोजिएको रहेछ। भ्रमलाई सत्यका रुपमा स्थापित गर्न उसले सेयर लगतको पुरानो (२०७८/६/२३) को विवरण राखेको रहेछ। त्यसपछि गोर्खा मिडिया नेटवर्कको सेयर लगतमा निकै फेरबदल भइसकेको तथ्यको कागजात उसले पाउन सकेन वा नियतबस लुकायो म भन्न त सक्दिन !,’ उनले थपेका छन्, ‘मैले ग्यालेक्सी टीभी छोड्ने बेलैमा आफूलाई दिएको (पैसा लगानी नगरी) सेयर सबै ट्रान्सफर गरेको जानकारी गराएको थिएँ। तर, मैले सार्वजनिक जानकारी दिइसकेको मात्र होइन, कानूनी रुपमै अलग भइसकेको कम्पनीसँग सम्बन्धित पुरानो कागजात भजाएर कान्तिपुरले के स्थापित गर्न खोजिरहेको छ, मैले बुझ्न सकेको छैन। उसले पुरानो कागजातको सहारा लिएर भ्रम छर्नुअघि नयाँ कागजात खोज्ने सामर्थ्य राखेको भए उसको नियतमा अहिले जसरी सार्वजनिक प्रश्न आउने थिएन। सेयर लगतको नयाँ कागजात तल पोष्ट गरेको छु जसमा मेरो सेयरवाला नभएको स्पष्ट देखिन्छ। ’

त्यस्तै उनले सहकारीले आफ्ना सदस्यबाहेक कुनै संस्थालाई ऋण दिनु कानून विपरीत रहेको र कानून उल्लंघन गरे सहकारी विभागले सम्बन्धित सहकारीलाई कारबाही गर्ने कानूनी व्यवस्था रहेको रविले उल्लेख गरेका छन् । तर आफू कर्मचारीको रुपमा कार्यरत संस्थामा लगानीकर्ताले कहाँबाट लगानी ल्याए त्यो उनले नभनेसम्म आफूले थाहा पाउने अवस्था नहुने पनि बताएका छन् ।

ग्यालेक्सीले कुनै सहकारीबाट अवैधानिकरुपमा ऋण लिएबापत तत्कालीन सेयर सदस्यका रूपमा आफूलाई पनि कारबाही हुने भए भोग्न तयार रहेको पनि रविले बताएका छन् ।

'विद्यमान कानून मलाई कारबाही गर्न अपर्याप्त छ भने संशोधन गरेर भए पनि अभियोग लगाउँदा हुन्छ । तर, यहाँ मेरो एउटा प्रश्न चाहिँ छ । मदिराको विज्ञापन गर्न हुँदैन भन्ने कानूनी व्यवस्था सञ्चारमाध्यमलाई थाहा छ कि छैन ? छ भने २०७५ सालमै बनेको यस्तो व्यवस्थाको वर्षौँसम्म किन बर्खिलाप गरी मदिराको विज्ञापन गरी नै रहे ? कानून त तिनी पनि बुझ्थे र बुझ्छन् होला ? मैले कानून जान्नु र बुझ्नुपर्छ भन्ने कुनै सञ्चारमाध्यम वा पत्रकारलाई लाग्छ भने उसले पनि जान्नु र बुझ्नुपर्छ कि पर्दैन ?', उनले लेखेका छन् । 

त्यस्तै उनले आफूलाई कान्तिपुर र कान्तिपुरहरुले विगतदेखि अहिलेसम्म नियोजितरुपमा प्रहार गरेपनि आफू भने जिम्मेवार नीति निर्माताको रुपमा कान्तिपुरहरुको अधिकारका लागि लडिरहने बताएका छन् । 

‘प्रश्न गर्ने वैधानिक अधिकार आफूसँग मात्रै रहेको ठान्ने सञ्चारमाध्यम प्रश्नैसँग तर्सिन्छन्। र, नियत राखेरै प्रश्न गर्नेको चरित्रहत्यामा केन्द्रित हुन्छन्। कान्तिपुरले विगतदेखि अहिलेसम्म मलाई गरेको प्रहार नियोजित श्रृंखलाको निरन्तरता हो। जुन निरन्तर रहनेमा ढुक्क छु। एक जिम्मेवार नीति निर्माताको रुपमा म 'कान्तिपुरहरु' को अधिकारका लागि पनि लडिरहनेछु।’, उनले लेखेका छन् ।