प्रतिलिटर २०० नाघ्यो पेट्रोलको मूल्य, डिजेलमा निगमलाई प्रतिलिटर १२० रुपैयाँ घाटा

काठमाडौँ । पेट्रोलियम पदार्थको मूल्य पुनः वृद्धि भएको छ । नेपाल आयल निगमले आज राति १२ बजेपछि लागू हुने गरी मूलय वृद्धि गरेको हो । पेट्रोल र डिजेलमा १५–१५ रुपैयाँ वृद्धि भएको निगमले जनाएको छ । 

मध्यपूर्वमा जारी द्वन्द्वका कारण अन्तर्राष्ट्रिय बजार मूल्य निरन्तर बढ्दै गएको र भारतीय आयल कर्पोरेशनबाट प्राप्त नयाँ खरिद मूल्यका कारण मूल्य वृद्धि गरिएको आयोगद्वारी जारी विज्ञप्तीमा उल्लेख छ । 

Watch On

निगमले पेट्रोलको मूल्य पहिलो वर्गमा प्रतिलिटर १९९ रुपैयाँ ५० पैसा, दोस्रो वर्गमा २०१ रुपैयाँ र तेस्रो वर्गमा २०२ रुपैयाँ तथा डिजेल/मट्टितेलको मूल्य पहिलो वर्गमा प्रतिलिटर १७९ रुपैयाँ ५० पैसा, दोस्रो वर्गमा १८१ रुपैयाँ र तेस्रो वर्गमा १८२ रुपैयाँ तोकेको छ । मूल्य समायोजनसँगै काठमाडौँमा पेट्रोलको मूल्य प्रतिलिटर २०२ रुपैयाँ पर्ने भएको छ ।
 
निगमले पहिलो वर्गअन्तर्गत चारआली, विराटनगर, जनकपुर, अमलेखगन्ज, भलवारी, नेपालगन्ज, धनगढी र वीरगन्ज, दोस्रो वर्गअन्तर्गत सुर्खेत र दाङ तथा तेस्रो वर्गअन्तर्गत काठमाडौँ, पोखरा र दिपायल डिपोलाई तोकेको छ । 

मूल्य समायोजन गर्दा पनि निगमलाई पाक्षिक ११ अर्ब ७१ करोड घाटा पर्ने निगमले जनाएको छ । निगमका अनुसार पेट्रोलमा प्रतिलिटर ३४.३६, डिजेलमा १२०.५४ र खाना पकाउने ग्यासमा ४१६.३७ रुपैयाँ घाटा रहेको छ । सोही कारण पेट्रोलियम पदार्थको खपतमा मितव्ययिता अपनाउन निमगले आग्रह गरेको छ । 

घाटा रकम बढ्दै जाँदा इन्डियन आयल कर्पोरेसनलाई भुक्तानी दिन नसकिने अवस्था सिर्जना भएको निगमका प्रवक्ता मनोजकुमार ठाकुरले जानकारी दिए ।